Parlamentario Clarisca Velazques…
Durante 8 aña no a hiba un maneho concreto y awe nos ta wak e resultado
ORANJESTAD (AAN): Di parti di parlamento di Aruba, nos ta lamenta loke cu a sosode den fin di siman y mas nos ta lamenta cu politiconan ta huza casonan lamentable asina pa hunga cu sentimiento di pueblo. Di parti di gobierno mi por a compronde cu desde e prome caso nan ta haciendo tur posibel pa evita mas desgracia den nos trafico cu ta insigur. Aña pasa mes Aruba a conoce no menos cu 20 morto den trafico y e aña aki esaki a yega na un total di 18.
Scuchando e declaracion haci di un of otro miembro di parlamento den opocicion ta pone nos pensa y corda e 8 añanan cu e ex titular di husticia Rudy Croes y omo di e actual parlamentario Eveline Wever Croes, tabata e minister encarga cu husticia, no a haci net nada pa combati criminalidad.
E unico cos cu nan a haci durante 8 aña largo, tabata cu nan a traha dos edificio di polis cu ta costando pueblo miyones di Florin y cual edificio nan a core nan campaña cu ne tambe bisando cu ta proyecto cu bo por mishi cu nan, pero e seguridad di nos pueblo mes a keda un banda poni pa motibo cu ningun di nan no tabata tin conocimiento di hiba un maneho corda pa sa con e systema hudicial ta funciona.
Lamentablemente e mesun partido cu ta den oposicion awendia, ta esnan cu durante nan gobernacion na un forma irresponsabel a para e opleiding pa formacion di polis pa algun aña cu awe ta pone cu e scarcedad di polis den cuerpo policial ta mas grandi cu nunca. Banda di esey a corta primeramente den e presupuesto di overtime pa polis na mitar y despues a elimina esaki por completo.
Consecuencia di esaki tabata cu criminalidad na Aruba a aumenta drasticamente y na mes momento esaki a trece cu ne cu personal di cuerpo policial den diferente departamento a worde desmotiva. Tanto esnan cu ta patrouilla pa mantene e orden publico como esnan cu entre otro ta labora den departamento manera esun di Recherche.
Mirando henter e problematica aki cu gobierno anterior a laga atras, nos por a tuma nota cu corectamente Gabinete Mike Eman na un forma responsabel a dicidi cu e personal di cuerpo policial lo haya nan overtime paga, pa di e manera aki bringa criminalidad cu man duro y tambe pa trece e orden publico back y esaki como representante di pueblo, mi ta aplaudi.
Mi no ta cuestiona loke cu e parlamentario Wever Croes a expresa door di a huza e frase di “Danki Dios cu por lo menos polisnan a lanta for di soño”, si no cu e mester a bisa cu danki Dios cu su omo no ta minister di husticia mas y cu Avp ta den gobierno awor, cu porfin e polisnan por worde motiva back pa haci nan trabao manera tabata prome cu 2001.
