Proyecto di FPNM cu ayudo di Aruba Bank cu a bira realidad
ORANJESTAD (AAN): Pa bo haya nos mucha- y hobennan den movecion, y practica un bida saludabel, Aruba mester tin docentenan motiva. Y cu esaki den mente Aruba Bank a patronisa e aña aki e proyecto di Fundacion pa Nos Muchanan “Move cu Placer” (di e proyecto di Hulanda “Beweeg met Plezier”).
Aunke cu e proyecto ta papia di movecion, e ta siñabo tambe otro cosnan sano di bida.
E proyecto tabatin e meta pa siña e participantenan cu movecion di curpa pa tin un bida saludabel, no ta nifica un dolor sino cu e mester worde haci cu placer. E mihor caminda pa cuminsa tabata cerca e muchanan cu ta Aruba su futuro y ken ta ser guia diariamente pa un gran parti di dia, e docentenan.
Un di e participantenan di “Move cu Placer” di FPNM y patronisa pa Aruba Bank tabata Emy Maduro, Coordinador Opleiding Movecion y Salud.
Den combersacion cu Emy el a mustra su escepticismo pa cu e proyecto, con el a experencia na cuminsamento, con el a bay ta cambiando y con el a caba esaki cu hopi satisfaccion.
Segun Emmy a conta, tempo cu e tabata bay school basico, e tabata mas pisa cu mayoria di su compañeronan di school, y na cas e no tabata haci mucho movecion. “Pami tabata mas importante pa mi haya bon cifra den matematica y idioma. Cada biaha cu mi tabata sa cu nos tabata tin gym na school, casi mi no por a drumi e anochi prome, y riba e dia di gym mes, mi tabata soda friew di nervio, paso mi tabata sa cu mi no por core mescos cu e otro muchanan, mi no por hunga mescos cu nan, catch y tira bala. Consecuencia tabata cu nan tabata tentami y yamami gordo, floho, olifante, bayena, etc.”
Cu e experiencia aki cu el a pasa tempo cu e tabata mucha chikito, el a crece cu e pensamento cu e mester move pa su mesun salud. Pero el a keda na pensamento cu nunca a concretiza na algo fiho. “Mi experiencianan di mucha a keda semper den mi memoria, y si mi haci algo pa movecion mi tabata scohe pa algo cu mi por haci mi so, manera: cana. Mi ta bay cana of train paso mi mester hacie, no paso e ta dushi pa haci…”
Sinembargo Movecion, esta bon 4+ a cambia perspectiva di Emy totalmente. E ta corda ainda bon cla e prome dia, con esceptico e tabata. “Den auto ainda mi tabata pensa: “Ta den kico mi a hinca mi curpa! Mi ta bay keda na werki !”. Pero …. E trainernan a haci un trabao fabuloso: nan a cuminsa poco poco y asina sigui “build up”. Pa di tres dia, mi tabata asina entusiasma, cu casi bo no por a kere cu mi tabata un hende cu no ta gusta movecion asina hopi.”
Emy ta splica cu e weganan cu nan a haci tabata dushi pa hunga, y aunke cu tabata tin e elemento competitivo entre e gruponan, e no tabata un stress pa gana; e meta tabata simplemente pasa bon cu otro. “E tabata asina dushi cu hasta ora mi tabata cansa, mi tabata kier a sigui cu e actividadnan.”
El a agrega cu e ambiente cu a ser crea tabata asina bon, cu ora cu bo mes tin cu purba haci algo, aunke cu e no ta bo specialidad, bo ta sintibo bon pa bo purba. E ambiente y e guia cu ta ser duna ta dunabo e confianza cu bo por purba, y no ta nada pa haci fout, paso e compañeronan ta dunabo sosten y tips pa bo sigui purba.
“Awe mi ta contento cu mi a participa na e curso, y aunke awendia mi no ta esun dimas slank tampoco, manera e titulo di e workshop ta bisa, mi a haya goso back den movecion.”
Y e tabata masha agradecido tambe na e instituto bancario, Aruba Bank, cu a haci e proyecto aki posibel cu nan aporte financiero. “Mi sa cu sin e aporte di Aruba Bank, e curso aki lo no tabata posibel; como docente mi ta masha contento cu mi por a participa pa sigui profesionalisa mi mes, como cliente di Aruba Bank mi ta contento cu mi ta forma parti di un compania cu tin nos comunidad y e desaroyo di nos hendenan na pecho. Masha danki Aruba Bank, now I know you understand!”
