Home Politica Segun Minister di Husticia, Ta bay bin control mas severo di trafico

Segun Minister di Husticia, Ta bay bin control mas severo di trafico

2
0
SHARE
- Advertisement -

arthurdowersORANJESTAD(AAN): Trafico na Aruba ta insigur y ta sigui exigi mas victima. Den un lapso di diez dia tabata tin un total di 5 morto den trafico. Relaciona cu esaki, Minister di husticia Arthur Dowers a tuma contacto cu polis y Diamars merdia mes nan a reuni. Pa colmo un dia despues a tuma lugar otro accidente den trafico cu a tuma un bida mas. Dowers a bisa cu e asunto aki ta un punto di preocupacion for di ora cu Gobierno a sinta. El a splica cu recientemente el a sinta cu Alto Comisario Peter de Witte tambe, pa intercambia pensamentonan riba e situacion di trafico na Aruba. Cuerpo Policial mes tabata reuni tocante e problemanan den trafico.

Segun e Minister, a yega na un acuerdo pa cuerpo policial di inmediato cuminza cu controlnan mas intensivo den trafico.

E Minister a hasi un apelacion na tur automobilista pa nan core trankil y cauteloso riba nos careteranan.

A acorda tambe cu ta bay institui un comision di cuerpo policial cu ta bay hasi un analisis di tur e accidentenan cu a tuma lugar e ultimo lunanan, pa asina haya un indicacion hopi cla, di cua ta e gruponan di hende cu ta causa mas peliger riba caminda.

A palabra tambe pa bin cu un comision consistiendo di Cuerpo Policial, Ministerio Publico y DOW, pa traha riba solucionnan di largo plazo y permanente, pa loke ta siguridad den trafico.
Tin hopi caminda pa mehora y tin hopi experto cu tin idea y pensamentonan hopi cla.

Esaki segun Minister Dowers, kende a sigui bisa cu e problema mester wordo ataca pa mas hende cu mester bin hunto y actua.

Dowers a bisa tambe cu lo tuma contacto cu e canalnan di television, pa cuminza bek cu e programa di seguridad den trafico, pero banda di esey mester tin sancion pa e comportacion di esnan cu ta trece trafico den peliger.

Hopi biaha ora un accidente serio pasa nos ta bay den shock, pero despues di esey hende ta sigui hasi loke nan ta hasi robez. A puntra e Minister si e hecho cu lo tin mas polis activo, lo nifica cu mas di nan lo ta trahando overtime y si Gobierno tin placa pa paga e overtime aki.

Segun Dowers, a papia di esey recientemente caba y loke a wordo palabra ta cu tin placa disponible ainda pa overtime cu lo wordo uza pa e aspecto di prevencion di trafico.

Si mester mas fondo, lo mester busca y pone esaki disponible, pasobra bida di hende ta bal mas hopi cu cualkier otro cos.

- Advertisement -

DUNA COMENTARIO

Please enter your comment!
Please enter your name here