Segun UNOCA sosten di comunidad na formacion cultural tabata grandi den 2009
ORANJESTAD (AAN): Mescos cu hopi instancia, UNOCA tambe a para keto un rato y rek nek ariba e aña cu ta cerando su portanan. Locual a resalta mas den 2009 ta e sosten sincero y responsabel cu actividad-/eventonan cultural a ricibi di diferente instancia-, departamento- y/o schoolnan.
E concientisacion notabel aki UNOCA a considera uno hopi positivo ya cu cada actividad cultural-educativo a nifica un contribucion balioso y tabata un otro granito na formacion di comunidad. UNOCA sigur ta desea pa e desaroyo aki sigui den 2010 ya cu e desaroyo a lo largo lo contribui na desaroyo cultural-nacional di Aruba.
Pa locual ta e trabao di UNOCA mes durante 2009, UNOCA ta satisfecho.
Diferente proyecto na bienestar di Aruba su poblacion, a keda sosteni y realisa. Por menciona e.o. school di Arte na San Nicolas, diferente buki y publicacion, documentacion audiovisual pa e.o. television, exposicion permanente paMuseo Arquelogico, presentacion-/conciertonan y aquisicion di un espacio permanente pa obranan di arte den Stadionweg.
Importante pa indica ta cu e tarea di maneha un fondo cultural na Aruba no ta facil ya cu nos comunidad ta chikito. Pero door di traha transparente y cu respet pa comunidad, UNOCA a bin ta conta cu sosten y confianza di hopi persona y instancia den nos comunidad.
Pa locual ta e influencia di e comunicacion rapido y menos personal cu e tecnologia di awendia ta trece cune, UNOCA tambe a experiencia aumento y rapidez di intercambio di informacion. Pero mesora mester agrega cu esaki no a afecta e cantidad di bishitanan na oficina di UNOCA. E cantidad di bishitanan tambe a aumenta den 2009. Sea pa informacion, peticion o pa compra di buki o dvd cultural-educativo.
Hopi agradecido UNOCA ta tambe na diferente persona-, organizacion-, instancia- , departamento- gubertamental y medionan di comunicacion pa e sosten, apoyo y cooperacion ricibi den 2009. Pa medio di e comunicado aki UNOCA ta desea di bisa sinceramente Masha Danki na tur!!!
Sin duda cu e sosten ricibi di parti di Gobierno di Aruba y Fondo Desaroyo Aruba a haci posibel cu UNOCA por a yuda tur e peticionarionan cu a acerca UNOCA pa un subsidio pa realisa nan proyectonan cultural pa e comunidad.
Por ultimo ta haci un suplica riba tur hende pa ban ta mas consciente di e balor di bida di cada ser humano cu ta biba aki na Aruba. Ban hunto yuda y respeta Polis su trabao y actuacion cu ta indispensabel p’asina garantisa cu nos famianan ta drenta 2010 feliz.
