Home General Solamente Esnan Cu Tabata Traha Bao Di Kl Sales And Marketing Company,...

Solamente Esnan Cu Tabata Traha Bao Di Kl Sales And Marketing Company, Lo Haya Nan Cesantia Den E Dianan Aki

2
0
SHARE
- Advertisement -

svb3ORANJESTAD(AAN): Dialuna DIARIO a entrevista director di SVB Ing. Edwin Jacobs, tocante e proceso cu e empleadonan di The Aruban Resort ta pasando aden, despues cu e compania cu tabata maneha e hotel a wordo declara bancarota.

Segun Jacobs, Diabierna merdia e tabata tin un reunion cu Minister di labor y el a hasi un apelacion fuerte na SVB pa acelera e proceso di e pago si cesantia pa e trahadornan di The Aruban Resort.

A base di e ley di cesantia, e empleadonan tin e derecho di haya placa for di e fondo di cesantia cu SVB ta administra.

Den tur esaki e fecha di retiro ta importante pa por calcula e suma di cesantia.

Tin curator cu ta aplica e articulo den e ley di bancarota cu ta duna un ‘opzeggingstermijn’ di 6 siman na e trahadornan, como fecha di retiro.

Tin otro curator cu ta bay e comision di retiro di Direccion di Labor y esey ta dura largo.

Jacobs a sigui bisa cu normalmente e ora ey si aplica esun di 6 siman, e empleadonan lo mester warda algun siman.

El a bisa cu Minister Oduber a splike cu e trahadornan di e resort tin mas di un luna sin cobra salario y mirando e temporada di aña cu nos ta aden, el a pidi SVB si lo por coopera pa duna e trahadornan algo mas trempan.

Jacobs a bisa e Minister e ora ey cu lo aplica e sistema di 6 siman.

El a duna palabranan di elogio na e empleadonan di SVB kendenan a duna un tremendo cooperacion pa Diasabra mainta inicia e proceso di registra e peticionnan.

Ta mas di 250 trahador a presenta na SVB na Vondellaan pa entrega nan peticion.

E empleadonan mester a yena un formulario, entrega dos slip di salario y I.D, pa tur cos wordo controla debidamente.

Diadomingo mainta trempan caba dos empleado di SVB a calcula e cesantia di tur e empleadonan.

Di Diadomingo atardi te cu marduga nan a keda traha riba esaki

Ora nan a keda cla, e documentonan a yega cerca director di SVB pa e firma e decisionnan.

Segun Jacobs, e ta spera cu den transcurso di Dialuna caba e prome decisionnan lo a yega Departamento di Finanzas cu tin cu bay ta trahando riba e cheque-nan, pa asina pa Diamars y Diaranzon e empleadonan cuminza haya esakinan.

Den e grupo di trahador cu a presenta, tin algun trahador cu no ta den servicio di e compania KL Sales and Marketing Company N.V cu a bay bancarota.

Esey ta nifica cu e empleadonan aki lo no por haya cesantia, pasobra e compania pa cual nan ta traha no a wordo declara bancarota pa huez.

DIARIO a puntra Jacobs si e empleadonan di Casino si ta cobrando.

El a bisa cu nan ta empleadonan di otro compania y esey bo por wak riba nan pay slip.

A base di esey nan no tin derecho riba e cesantia.

Jacobs a calcula cu alrededor di 160 trahador ta bay haya cesantia.

E suma total cu lo wordo paga ta bay ta alrededor di 400.000 florin.

Intencion ta pa tur esnan cu derecho riba cesantia haya nan placa prome cu Diaranzon merdia.

Manera cu e cheque-nan ta cla, lo tuma contacto cu e personanan pa nan busca e cheque-nan na Vondellaan.

E ley di cesantia ta pone si cu SVB mester kita e AOV, AZV y Loonbelasting.

E AOV ta 13.5%, e AZV ta 9.5% y e Loonbelasting ta 11%.

- Advertisement -

DUNA COMENTARIO

Please enter your comment!
Please enter your name here