Tabatin Mas Bishitante Pero Cu Menos Ingreso Di Cada Turista
Banco Central resumiendo October…
ORANJESTAD (AAN): Riba Diaranzon, Banco Central di Aruba a conclui den su Relato Mensual, cu e cantidad di turista na Aruba a subi considerablemente den October 2009, registrando 63.252 bishitante, compara cu 58.956 bishitante na October 2008.
E subida a worde causa mas tanto door di bishitantenan di Merca y Venezuela.
No obstante, Banco Central ta mustra den mesun rosea, cu e datonan preliminario di ingreso relata na Turismo ta indica un bahada di 4.2 porciento durante October 2009 compara cu e aña anterior, sugeriendo un tendencia continuo di menos gastamento pa cada turista.
E cantidad di turista den e prome diez lunanan di 2009 ainda a keda atras na e nivel di 2008, esta -1.9 porciento. E mercado Europeo (cu un subida di 5,2%) tabata e unico categoria cu a registra un crecimento significante den e periodo aki. Aparentemente e efectonan di e cancelacion di e vuelonan regular di KLM pa Aruba a worde compensa pa e capacidad creciente di otro Aerolineanan, incluyendo aerolineanan for di otro paisnan Europeo (manera Spaña, Italia, y Gran Bretaña).
E turismo crucero a mantene un prestacion fuerte den October. E cantidad di barco a mas cu duplica, mientras cu e cantidad di turista crusero a aumenta cu 43 porcineto compara cu October 2008. Den e prome diez luna di 2009, e subida di e cantidad di turista crusero tabata 9.3 prociento, e cantida ddi barco crusero a crece di 216 te na 234.
Otro sectornan di e economia Arubano no a duna señal di ta recuperando. E entrada real di impuesto riba benta di negoshi (BBO) colecta na November 2009 cu ta refleha un produccion genera mas tanto na October 2009, a mengua cu 5,3% compara cu e suma corespondiente di 2008. Adicionalmente, entrada for di impuesto riba importacion a cay cu 8.4% den November 2009, ora cu compara cu November 2008.
E indice di prijs di consumo na final di e periodo di November 2009 a mustra un inflacion di 1.7%. Cu esaki ta marca e final di un periodo deflacionario di diesun luna. Consecuentemente, e tendencia negativo di e promedio anual di e tasa di inflacion a debilita significantemente. Pa 2009, ta worde spera un deflacion di como 2.1% (promedio anual).
E cantidad di placa den circulacion a subi du 14.0 miyon Florin te na 3.141.3 miyon Florin. Esaki tabata resultado di un aumento di e fluho neto di fondo for di exterior di 34.5 miyon Florin cual parcialmente a worde mitiga pa un bahada den e activo domestico neto di Afl. 20.5 miyon. Consecuentemente, e reserva di divisa (excluyendo diferencianan den revaluacion di oro y reservanan internacional) a subi te na Afl. 1,453.3 miyon.
Prestamo na e sector priva a baha cu Afl. 5.8 miyon, mas tanto door cu empresanan a haci menos uzo di prestamo di cuenta coriente. E bahada den e prestamonan di e banconan comercial na empresanan ta un continuacion di e tendencia cu a cuminsa na Januari ultimo.
Di otro banda, credito na personanan individual a crece un tiki den e prome dies lunanan di 2009, a consecuencia di un aumento den hipoteca pa construccion di cas. Contrario na esaki, un caida continuo den prestamo pa auto na e banconan comercial a worde registra den e mesun periodo, cual a suma na 10 porciento. Consecuentemente, e total na prestamo pa auto a worde reduci cu Afl. 21.3 miyon te na Afl. 183.7 miyon.
Den comparacion cu October 2008, e entrada di gobierno a cay cu Afl. 6.0 miyon te na Afl. 104.8 miyon, como resultado primordialmente di un bahada di Afl. 11.1 miyon den e fondo for di Hulanda. E entrada di impuesto a subi cu Afl. 5.1 miyon, yegando Afl. 75.0 miyon, mas tanto atribui na un subida di Afl. 4.0 miyon den e entrada for di impuesto riba ganashi.
No obstante, e total di entrada di impuesto riba ganashi pa e prome dies lunanan di 2009 a suma Afl. 77.7 miyon, cual ta Afl. 6.2 miyon menos compara cu e periodo corespondiente di 2008. E caida aki ta un indicacion di un reduccion den rentabilidad di e empresanan Arubano durante 2009.
