Home Politica Tin varios alternativa cu Gobierno ta bay studia pa reforza nos cuerpo...

Tin varios alternativa cu Gobierno ta bay studia pa reforza nos cuerpo policial

0
0
SHARE
- Advertisement -

avparthurdowers-4Entre otro, busca polisnan pensiona pa tempo cortico:
ORANJESTAD (AAN) – Durante e entrevista cu nos redaccion a tene cu Minister di Husticia, señor mr. Arthur Dowers, nos a puntre kico ta prioridad pe, como mandatario, na e momentonan aki, y ki lugar e aspecto di seguridad ta ocupa den su prioridadnan. E mandatario a expresa cu sigur, seguridad ta e prome prioridad den su maneho. “ Mi ta kere cu pa tur minister di husticia, pasobra esaki ta un parti grandi di e tarea y e budget di ministerio di husticia ta worde uza pa garantiza seguridad di pueblo, y mi ta kere cu e seguridad aki, nos no por garantize si nos no traha den un forma integral cu hopi departamento.


“ Nos ta mirando na aworaki un aumento bastante severo di criminalidad na Aruba, y esey ta tumando lugar e ultimo añanan y hopi bez a neglisha e situacion social di nos comunidad.
“ Nos ta mira, por ehemplo, muchanan creciendo bao condicionnan sumamente dificil, cu ta worde maltrata y abusa.

Y e muchanan aki, si no por guia nan pa nan cana e caminda corecto, dentro di algun aña hopi lihe e muchanan aki ta bira criminalnan, y criminalnan grandi.

“ Ta lamentable cu nos ta mira hobennan ta cometiendo atraco arma, muchanan den edad di 11- 12 aña di edad, cosnan cu nunca nos a prevee na pais Aruba pero esey ta e realidad di awe.

“ Kiermen, si nos no atende e muchanan aki, si nos no duna informacion, si nos no aumenta e cantidad di polisnan riba caya, y tambe educa nos hendenan y percura pa nan ta den un situacion cu nan por sobrevivi sin haci cosnan ilicito, nos lo keda carga awa hiba lama”, e dignatario a remarca.

Minister Dowers a subraya cu Aruba mester di un Cuerpo Policial cu no solamente ta cana patras di e problemanan pero tambe ta yuda preveni esakinan.

“ Door di esey nos kier cera cabes cu e Departamentonan di asunto social, salud y enseñanza pa nos weita con nos ta bay mantene nos hobennan na school, saca nan for di caya, garantiza cu nan haya un desaroyo sano. Asina nos por preveni y ataca e problema di criminalidad hopi severo”, segun e dignatario.

Pa ataca e problema di crimen hopi pisa, e mandatario a pidi Ministerio Publico pa tene cuenta cu mester, den cierto casonan, pidi castigonan mas pisa posible pa e señal ta hopi cla, pa e criminalnan den nos comunidad cu gobierno no ta tolera cierto actonan.

“ Ta keda na final, claro, ki castigo Huez ta dicta, pero mester di un señal cu e tempo cu bo por a haci y deshaci contra hendenan inocente den comunidad, mester tin un paro”.

Tocante e hecho cu for di hopi aña caba, incluso durante e gobernacion prome di AVP, tin scarcedad di polis na Aruba, pero AVP a purba soluciona e problema treciendo polis for di Hulanda pa bin reforza KPA. Nos redaccion a puntra e dignatario ki posibilidad tin pa bolbe haci esaki awor.

“ Nos ta bay evalua tur posibilidad. Mi ta kere cu tin funcionnan specializa cu lo no por soluciona riba termino cortico, cu hendenan di nos mes. Nos mester educa y prepara hende pa haci e funcionnan aki, e por ta un alternativa pa tuma hendenan di afo, por ehemplo di nos mes pais cu ta biba afo, of den nos region, tambe Hulandesnan cu por bin den KPA.

Pero ademas tin otro posibilidadnan con por facilita cierto trabaonan di polis; nos mester haya mas polis riba caya, nos mester pensa riba e posilibilidad di automatizacion, y tambe ta hopi importante pa pensa riba e polisnan cu a bay cu pension, cu ta den hopi bon condicion ainda, cu por ta lo por contribui cu cierto departamentonan, por ta pa un aña of un tempo cortico, pa alivia e peso cu e polisnan cu ta trahando awor tempo completo tin.

Nan por yuda frena e inseguridad riba e careteranan di Aruba, por ehemplo, y crea e situacion unda nos por sinti mas sigur”, segun Minister Dowers. El a subraya cu tur e alternativanan aki mester worde studia y wak cuanto e ta bay costa gobierno y basa riba esey, por tuma cierto pasonan.

Pa otro aña, gobierno ta bay haci e intento di educa un grupo mas grandi di polis, pa asina na largo plazo tin mas polis prepara na Aruba.

- Advertisement -

DUNA COMENTARIO

Please enter your comment!
Please enter your name here