Home Editorial UN TRAFICO INSIGUR Y ASESINO

UN TRAFICO INSIGUR Y ASESINO

3
0
SHARE
- Advertisement -

jossy_mansur_pic              Ta con bo por evita di ta den shock ora cu bo ser confronta cu tragedianan cu ta afecta un o mas famia na Aruba profundamente? Y den un temporada den cual nos tur ta anhela pas y sosiego mas cu nada otro, pa por dedica nos mes pa sikiera un dia na Esun cu a crea nos den su imagen y ta haci aña dentro di algun dia? E ultimo accidente di trafico a cobra bidanan hoben, yen di speranza pa un futuro cu nan lo kier a experiencia, pero cu un percance fatal di trafico a interferi pa priva nan di dje.

            Personalmente mi conoce un di e famianan hopi bon, y ta lamenta profundamente e caso tragico cu a horta nan di un ser keri. Mi ta referi na Chima y su yiu (awe difunto) Dickie, kende a studia cu mi yiunan na Castle Heights Military Academy, na Lebanon, Tennessee. Un hoben pletorico di bida, cu mi tabata mira cada biaha cu mi mester a pasa e puesto di control na aeropuerto prome cu aborda un avion. Su sonrisa y su saludo semper tabata cariñoso y yen di respet, evidencia di un educacion na cas y na school hopi efectivo. Di un momento pa otro el a desaparece como ser viviente, aunke mi ta sigur cu e ta sinta caba banda di Señor, den un paraiso cu no conoce dolor ni sufrimento. Dentro di e pena gigantesco cu e famianan ta sintiendo, e conviccion aki ta permanece como un gran consuelo, pasobra e ta keda como e anhelado realidad final di tur nos bidanan.

            Trafico na Aruba a bira un asesino mas di nos hobennan, sin limita su mes na nan so, pasobra otronan di edadnan mas avanza tambe tabata victima di dje. Ta kico ta pasando cu ya nos careternanan no ta sigur mas? Exceso di autonan riba caminda? Exceso di velocidad? Influencia alcoholico? Careteranan den mal estado? Den e caso di Dickie esey no tabata e caso, pasobra fiel na su caracter el a djis para pa ofrece asistencia na dos auto cu a caba di boks. Na e momentonan ey factornan imprevisto a combina pa causa un accidente mahos, tragico, cu a laga un awacero di lagrima atras den diferente famia Arubiano.

            Algo radical mester ser haci pa evita otro accidentenan fatal, especialmente den e epocanan di fiesta, durante cual hopi hende ta lubida cu tin un mañan y cu e euforia di celebracionnan diurno o nocturno, y por cierto pasahero, no ta un excusa pa risca bida riba caminda. Por ta cu hopi mas vigilancia di polis riba caya, actitudnan mas severo cu e infractornan di e reglanan di transito, y e imposicion di multanan halto por yuda evita, den algún sentido, mas accidente fatal riba nos careteranan. Aruba tin un exceso di auto riba caminda, cu ta sigui aumenta cada aña, y ta bay conduci nos pa situacionnan dificil di regula o controla debidamente den e futuro inmediato.

            Nos mester acepta e evidencianan y aplica e medidanan corectivo rekeri. E realidad ta cu nos tin un problema serio di trafico, y ningun di nos por sinti su mes trankilo sabiendo cu nos yiunan, familiarnan o amigonan ta exponi na e riesgonan grandi cu ta presente den e trafico insigur di awendia. 

            Aunke semper polis ta cumpli cu su tareanan, mi ta kere cu e momento a yega pa nan pone man na obra pa controla trafico cu radar, cu vigilancia personal, y cu puestonan di control na e puntonan clave di nos isla. E criterio di impone seguridad (na lugar di desea pe) mester prevalece pa trece trafico back riba e caminda cu e mester ta, o sea e punto cu ta ofrece seguridad pa tur e habitantenan di Aruba cu ta haci uso di nos careternan.

            Mi ta termina ofreciendo mi condolencia na tur e famianan cu a perde un ser keri, y mi oracionnan pa Dios duna nan forza pa soporta e momentonan hopi dificil y hopi tristo cu nan ta atravesando actualmente.

- Advertisement -

DUNA COMENTARIO

Please enter your comment!
Please enter your name here