Minister Benny Sevinger a confirma:
ORANJESTAD (AAN) – Den cuadro di monumentonan, gobierno nobo ta trahando estrechamente cu Oficina di Monumento, y den e cuadro aki, señora Ark. Yvonne Webb, ta hopi entusiasma cu e proyectonan. Asina Minister Benny Sevinger, titular di Infrastructura, a comenta recientemente den un entrevista cu nos redaccion unda el a confirma cu Water Toren di San Nicolas, lo worde restaura.
El a bisa cu Oficina di Monumento ta participando den henter e estudio pa restauracion di ciudad, tanto den Wilhelminastraat como na San Nicolas.
Den e contexto aki tin edificio historico na Playa y San Nicolas, cu gobierno ta bay evalua cual di nan por worde drecha den e proximo añanan y dos di nan ta e Water Toren tanto na Playa como den e distrito di San Nicolas.
Nan ta den e lista di monumento y gobierno a pidi pa haya e dossiernan aki pa cuminza traha riba nan di inmediato.
Minister Sevinger a subraya cu historia ta mustra cu e Water Toren di San Nicolas a worde duna pa WEB Aruba pa un florin, e temponan aya, y e instancia aki tabata kier pa bin cu un museo di awa y electricidad, cual tabata un bon idea, pero despues WEB a bisa na caminda, cu nan no ta mucho interesa den esey mas.
Den e conversacionnan cu e dignatario a hiba cu Oficina di Monumento, a worde palabra cu nan cu nan lo acerca WEB pa puntra nan, si por bay bek na e idea original.
Na e momentonan aki Oficina di Monumento ta haciendo un analisis ta cuanto esaki ta bay costa pa drecha e Water Torennan, y eventualmente e inversion lo ta di 3 pa 4 miyon florin.
Y na momento cu por yega na un conclusion cu WEB, gobierno lo destina un Arkitecto via di Oficina di Monumento pa asumi e trabao aki. Gobierno mes ta prefera cu door cu e edificio ta di San Nicolas, envolve un Arkitecto di e distrito aki den dje, pero ta Oficina di Monumento hunto cu Fondo pa Monumento, lo mira esaki, pa asina cuminza cu e proyecto aki.
