Home General Alina Mansur Eligi Como E Prome “International Carnival Queen”

Alina Mansur Eligi Como E Prome “International Carnival Queen”

3
0
SHARE
- Advertisement -

Minister Michelle Winklaar a bay felicit’e personalmente na su yegada

El a keda eligi entre 13 diferente candidata di 12 diferente pais

alinaORANJESTAD (AAN): “Alina pabien! Nos ta masha orguyoso di bo”, ta cu e palabranan aki Minister di Asuntonan Economico, Asuntonan Social y di Cultura, Minister Michelle Winklaar a saluda e beyeza Arubiano na su yegada ayeratardi for di Corsow.

Gobierno a organiza un ceremonia di recepcion pa e beyeza local cu ta e Reina di Carnaval di Aruba 2009. el a caba di participa den e prome certamen di “International Carnival Queen” cu a tuma lugar den weekend na Kleine werf na nos isla bisiña Corsow.

   “No ta tur dia nos ta tende cu nos representantenan a sobresali y conkista coronanan internacional den certamennan di beyeza. 

Pero cada bez cu algo asina sosode, nos tin di para un rato keto pa realiza con bon nos isla ta y con nos hendenan ta sobresali y saca nos cara internacionalmente. E tipo di propaganda y promocion cu Aruba ta ricibi despues di cada evento asina ta casi impagabel. Ta pesey, Alina…den nomber di Gobierno di Aruba, permitimi yamabo danki pa bo participacion y pabien pa bo logro.

Nos ta masha orguyoso di bo”, asina Minister Michelle Winklaar a duna di conoce ayeratardi den VIP Room na Aeropuerto.

   Esaki ta e prome bez cu ta organiza e certamen di “International Carnival Queen” cu na un principio a conta cu 15 participante pero lamentablemente dos participante a cay afor na ultimo ora. Asina tabatin 13 participante representando 12 diferente pais di tur parti di mundo. Paisnan cu ta celebra Carnaval mes of mas grandi cu nos isla a midi forza hunto den un solo certamen di beyeza y inteligencia.

   Na final, e participante di Isla Margarita (Venezuela) a bay cu e premio di Miss Gorgeous; e representante di Barbados a gana e premio di Miss Congeniality, e representante di Tenerife a conkista e premio di Miss National Costume,  mientras cu Alina Mansur di Aruba a gana e premio di Miss Carnival Costume. Den e premiacion final, Tenerife a bay cu 2nd runner up di e certamen di beyeza, sigui pa St. Maarten cu a resulta e 1st runner up y pa na final e anochi nan a anuncia cu e prome International Carnival Queen a keda den persona di Alina Mansur di Aruba.

   Claro cu tipo di logronan asina ta yena nos tur di orguyo y satisfaccion pa sa cu no solamente nos ta na di tres lugar di mundo den e paisnan cu tin e mihor Carnaval pero tambe cu nos por bisa orguyosamente awor cu nos tin e maximo beyeza di carnaval di mundo cerca nos aki na Aruba.

   Riba e fotonan den pagina 33 por aprecia Minister Michelle Winklaar hunto cu Tecla Kelly di SAC, famianan y International Carnival Queen Alina Mansur na su yegada ayeratardi for di Corsow.

- Advertisement -

DUNA COMENTARIO

Please enter your comment!
Please enter your name here