Diario Online

Analisis politico…… KLM na Aruba atrobe

Publication: Saturday, 30 January 2010. Categoria: Politica

Pa un isla chikito manera Aruba e baymento di KLM tabata un sla duro. Poco tempo pasa KLM tabata bin y bay casi tur dia cu un avion grandi for di Europa cu un cantidad grandi di pasahero y un cantidad grandi di carga. KLM ta un di e companianan di aviacion grandi di mundo y uno hopi respeta tur caminda. E gobierno di MEP a logra di core cu e compania aki cu tabata bula ariba Aruba pa decadanan cu hopi exito. Miles di nos hendenan durante e decadanan aki a biaha cu KLM pa motibo di negoshi, estudio y otro actividadnan. Tur Arubiano normalmente tabata orguyoso di tin un compania di aviacion asina respeta como e compania cu ta bula casi tur dia pa nos isla. Tur e añanan Aruba tabatin un relacion bon cu KLM te ora cu a sinta un gobierno di MEP bao di Nel Oduber y su ministronan.

Pa nan tin totalmente otro balornan ta conta y asina nan a actua durante e ultimo 8 añanan. Nan mentalidad ta un dirigi completamente ariba nan mes y e hendenan cerca di nan. Ningun momento nan tin e interes di nos pueblo na pecho.

Esaki no ta algo pa tuma leve. E ta un mentalidad cu ta parti di e caracter di e dirigentenan di MEP. Esaki no ta algo cu temporalmente e ta existi. E ta algo cu ta keda den nan nan bida largo. E mentalidad aki ta pone cu nan celebro ta traha di un manera mesquino y tur hende cu pensa otro ta nan contrincante.

Pa nan un KLM no tin significacion grandi y si e tey of no pa nan no ta haci mucho diferencia. Ta pesey tabata posibel cu KLM a bay for di Aruba y ningun momento e gobierno a haci un esfuerzo pa trata di convence KLM pa keda y mira ta kico e problema di KLM tabata cu e no kier a bula ariba Aruba mas.

E mentalidad akl ta devastador pa e desaroyo sano di un pais. Hopi biaha den nos analisis nos a trece padilanti cu lamentablemente nos sa cu ora MEP ta den gobierno cosnan manera esaki ta sosode. E a sosode semper cu MEP ta den gobierno.

Tin biaha pio tin biaha un poco menos pero semper MEP den gobierno ta destructivo. Te awe ora papia cu e dirigentenan di MEP nan ta trata di convence bo cu KLM pa Aruba no tin importancia. Di verdad nan no ta mira e balor di un KLM pa nos isla. Loke sinembargo a pasa na Aruba durante e añanan cu a pasa ta cu un parti di nos pueblo a bay cu e coriente maligno di MEP y a para un banda y acepta un gobierno maligno y no a lanta para pa purba di cambia e rumbo di nos pais.

Hopi tabata esnan cu a bira cara y otro a hasta a bay cu e gobernantenan yudando nan destrui cosnan valioso di nos pueblo. Organisacionnan, institutonan cu mester ta critico y no mester a acepta e maldad cu a worde comete contra Aruba a mustra un actitud di cobardia y a laga e interes di nos isla un banda pa e dirigentenan di MEP abusa manera nan tabata desea.

Cu e dirigenenan di e sindicato cu a coopera cu MEP pa introduci e BBO ariba lomba di nos pueblo no por a bay contra e gobierno di MEP tabata bisto pero organisacionnan manera AHATA y ATIA mester a grita contra gobierno ora cu nan a mira cu e gobierno di MEP a core cu KLM. Nada di esaki nos por a mira.

Nan mas cu cualkier organisacion mester tabatin un acgtitud activo contra e desaroyonan negativo cu tabata tuma luga. Nan mester haci todo por todo pa para e bagamunderianan di MEP pero nan no a haci esaki. Nan a sconde y laga e desaster tuma luga.

Nos ta di opinion pa loke a sosode no worde lubida pasobra nos mester percura pa esaki no por tuma luga nunca mas. Ya caba awo e mesun hendenan cu tabata scondi cobarde pa habri nan boca awe pasobra tin un gobierno drechi ya caba tin nan boca yen tur dia cu e solucionnan pa e problemanan cu pa hopi tempo nan no a wak.

Cada rato nan ta den publicidad lubidando nan cobardia di hopi tempo cu a yuda pone Aruba unda e ta awe. Nan hunto cu e dirigentenan di MEP por bay para na e hekki di aeropuerto ora cu e prome buelo di KLM ta bin Aruba pa nan saluda un epcoa nobo pa nos isla logra door di gobierno nobo.