ORANJESTAD (AAN): Ex ministro Briezen ta keda demostra e incapacidad di dje y di su gobierno di MEP. Durante campaña miembronan di AVP a tuma contacto cu e companianan di crusero, KLM y American Airlines.
Den tur tres caso a resulta cu ni Briezen of caulkier ministro di e gobienro di MEP a tuma contacto cu e companianan aki pa mira con pa soluciona e problemanan cu a worde causa pa nos isla.
Awe en vez di cera boca y acepta cu nan a blunder den e casonan aki nos ta tende Briezen critica e hecho cu e gobierno nobo ta solucionando e problemanan aki na un manera serio y efectivo.
Haciendo esaki Briezen ta enfatiza su incapacidad claramente. Berdad a bin un crisis financiero mundial cu tabatin su efecto na Aruba tambe pero un gobierno cu vision lo tabata ariba e problemanan inmediatamente y cu hendenan capaz y experiencia lo a bin cu alternativanan pa e economia di Aruba.
E mesun mentalidad atraza cu nos ta mira cerca e ex ministro Briezen awe tabata e mentalidad cu a para wak kico ta pasando cu nos pais sin cu e gobernantenan a sa di haci algo pa remedia e situacion.
For di oposicion caba e gobernantenan di awe a mustra con gobierno mester a atende e asuntonan pero ningun oido cerca e gobernatnenan di MEP. Pakico ta importante pa bin cu e cosnan aki mientras nan ta pertenece na pasado ta pasobra pueblo mester keda conciente di e desaster cu MEP a trece pa nos isla. Esaki no mag ripiti nunca mas.
Si un Briezen lo tabatin un actitud di realiza y admiti su erornan un speranza por a bin cu den futuro MEP den gobierno lo haci otro pero ta bisto cu esaki no ta existi cerca Briezen. Nan a destrui un parti grandi di nos economia y te awe nan no ta realiza e daño grandi cu nan a trece pa Aruba.
Pa motibo di un maneho maligno nos economia a cay y door di esey e entradanan di gobierno a baha dramaticamente door di cual e gobieirno di MEP a dicidi di pone e medidanan cruel ariba lomba di nos hendenan. E entrada di gobierno a baha pero e fiesta di friends and family si a sigui cu e consecuencia cu mester a busca mas placa pa por a keda paga tur e sumanan compremeti cu amigo y famianan.
Ora nos tende un Briezen papia awe ta parce cu e no ta sinti e dolor cu nan a causa miles di nos mayornan. Mayornan cu no sa con pa duna nan yiunan di come y di bisti. Ta increibel cu Briezen tabata parti di e gobierno cu a haci tur e maldad y awe no ta mustra un duele di e miseria cu su gobierno a trece pa Aruba. Pesey ta nos deber di keda mustra tur dia kico e ministronan di MEP a haci cu Aruba pasobra no mag ta asina cu despues di poco tempo hendenan a lubida con malo MEP ta y ta keda.
Pueblo a sinti e dolor di 8 aña di MEP y a duna AVP un victoria grandi castigando MEP pa su maldad. Daña ta daña lihe pero drecha loke a worde daña si ta tuma hopi tempo, trabao y esfuerzo. E miembronan nobo di MEP cu por a bin cu idea y idealnan nobo ta resultando di ta pio cu bieunan cu ta bayendo. No tin ningun indicacion cu cerca e candidatonan nobo tin plannan pa cambia e rumbo di e partido.
Alcontrario ora tende nan trece nan puntonan di bista padilanti un ansha ta lanta pasobra nan ta zona mas atraza cu esnan cu ta bayendo. Nan contribucion na e desaroyonan politico ta pober y ora nan comenta ariba algo nan ta mustra cu nan no tin ningun idea di mayoria topico. Nan tin e mesun gritonan standard cu semper MEP tabatin. Gritonan bashi y solamente insulto direccion di nan contrincantenan politico sin cu nan por bin cu proposicionnan positivo pa futuro di nos pais ta loke nan ta haci continuamente.
Nel Oduber a desaparece for di politica y tur esnan cu ta guiando e partido awo ta mustra menos capacidad ainda cu Nel tabatin. E futuro di e partido aki ta mustra hopi scur.
