Azv no por paga dunadornan di servicio completo e luna aki
Carta a sali pa tur cu ta wardando pago…
Gobierno a haya un caha hopi bashi cu tur consecuencia…
ORANJESTAD(AAN): Informacion cu DIARIO a haya ta bisa cu dunadornan di servicio lo no haya nan pago 100% e luna aki. E situacion financiero di gobierno ta hopi caotico y departamento di finanzas no ta los placa. E dunadornan di servicio a base di un carta a ser notifica cu nan lo cobra 65% so di nan placa. December caba nan a cobra 75% di nan salario y January a haya e otro 25%. Awor fin di January ora cu a kere cu e placa a pasa a resulta cu ta 65% di e placa so a ser traspasa.
Su tras nan a haya un carta tambe notificando cada dunador di e situacion caotico. Pa colmo no tin fecha parce pa nan cobra e otro 35% pasobra ta wardando e aprobacion di e landsbijdrage pa asina complimenta e resto cu AZV debe e dunadornan di servicio. Pa 2010 ta premira un debe di 164 miyon Florin na AZV.
Esey caba ta un indicacion cu e maneho cu a ser hiba door di e board nunca por tabata uno asina positivo. E pregunta ta si e directornan actual por a haci algo pa alivia e situacion aki. Si ta bon ta pesey e minister anterior a gabanan asina hopi. Parce cu nan mester a bin haci e milager pa gobierno.
Esaki no a logra finalmente pasobra ata e gobierno nobo cu un problema serio. Minister Richard Visser a bisa DIARIO cu e ta spera cu e reunion ser trata rapidamente den parlamento pa asina nan keda cla cu e fondonan necesario y asina paga e dunador di servicio.
Nos no sa con e dunador di servicio lo bay acepta e carta cu nan a haya ayera. Den pasado tabata tin un tipo di protesta y te hasta a cuminsa cobra pa consulta pa complementa e resto di placa y por paga e empleadonan.
