Caso laptop di Claudius Phillips den Corte
Acusado a bisa di a keda den shock di locual el a mire den e aparato
ORANJESTAD(AAN): Diabierna na corte di husticia a tuma lugar e caso famoso di hortamento na cas di Claudius Phillips. Ta asina cu Javier A.A naci na Corsow, Delanho J.J naci na St. Maarten y Jean J.J.F naci na Boneiro, a wordo acusa di a kibra drenta den cas di e cantante riba 10 di October 2009 y eynan nan a horta entre otro dos laptop, un television flat screen, un holoshi hopi caro, algun hoya, un I-Pod y placa. Huez a repasa rapport di e caso y a bisa cu Claudius Phillips a entrega un keho cerca polis den cual e ta bisa cu malhechornan a forza un bentana di su cas y a bay cu e articulonan, despues cu el a Sali for di cas alrededor di 12 di anochi.
Den prensa e caso aki a Sali mas ainda den publicidad tambe ora cu Poentje Castro a yama Claudius pa bise cu e tin contacto cu un persona cu lo tin su laptop.
Ora cu Phillips a bay polis y prensa cu potret di su holoshi, polis a cuminza investiga y a bay na un tienda di ‘Compra y Venta’ pa wak si nan lo por a cumpra e holoshi.
Propietarionan di e lugar a bisa cu enberdad nan a cumpra e holoshi y cu nan tin nomber di e persona registra manera semper nan ta hasi.
Nan a bisa si cu e holoshi no tabata tey mas y cu el a bay Merca.
Sinembargo despues a resulta cu ta gaña nan a gaña, pasobra nan tabata tine den nan kluis.
Polis a logra haya nomber di e persona cu a bende e holoshi, cu tabata pues Javier A.A.
El a bende e holoshi cu nan pa 2400 florin.
Polis a detene y el a admiti cu el a horta hunto cu otronan.
El a menciona nomber di Delanho y su amigo.Javier a declara na polis cu ta Delanho a bin cu e idea pa bay horta den un cas na Wayaca.
El a bisa cu ta te ora nan a yega na e cas, el a haya sa cu ta cas di Claudius.
Na corte el a keda para riba su declaracion, pero ora huez a puntra Delanho ta ken a bisa cu e idea, el a bisa cu tabata Javier.
Ambos a culpa otro di a bin cu e idea.
Jean a declara cu na dado momento Delanho a yame y a bise cu nan tin pensa di horta na cas di Claudius y el a dicidi di bay cu nan tambe.
El a bisa huez na corte cu no ta prome biaha cu e y Delanho a planea pa hasi algo.
Jean tabata prome persona pa drenta tereno di e cas y el a coi un trapi subi riba balcon y eynan el a haya un bentana cu el a forza pa e drenta.
El a habri porta di e cas y e otronan a drenta.
Nan a bay cue articulonan y a parti esakinan.
Jean tabata esun cu a keda cu e famoso laptop di Claudius y el a conta huez cu el a dicidi di wak den e computer.
Huez puntre si horta e laptop no tabata suficiente y cu si tabata necesario pa mas ainda atacha privacidad di e artista.
Jean a bisa cu e tabata curioso.
Huez a puntre di con el a tuma contacto cu Poentje Castro.
El a bisa cu tabata tin cosnan cu el a wak riba e computer, di cual e ta haya cu nan mester a wordo investiga.
Como cu el a yega di wak programa di Poentje y ta di opinion cu Poentje ta un persona cu lo sa kico pa hasi, el a tuma contacto.
Huez a puntre di con e no a bay polis y el a bisa cu e ora ey sigur e lo wordo deteni y e no sa si lo tume na serio pa loke e tabata bisando di contenido di e laptop.
Huez a puntra Jean tambe si na dado momento el a purba di chantagea Claudius y el a bisa cu no.
El a splica cu el a tuma contacto cu Claudius pa pidie pa kita e keho cerca polis, pero e cantante a bisa cu ta laat caba.
Segun huez, Claudius a bisa cu Jean a purba di ‘blackmail’ e.
Huez a puntra e acusado di con e ta pensa cu e ta e persona cu mester hasi algo cu e material cu el a wak riba e laptop.
Jean a bisa cu e tabata gewoon den shock pa loke el a wak.
Huez a puntra Jean ta kico el a wak riba laptop di Claudius, pero e no kier a bisa.
Fiscal a exigi un castigo di 120 dia, di cual solamente e 86 dianan cu e acusadonan a sinta ta incondicional.
E 34 dianan cu resta, lo mester colga riba nan cabez como castigo condicional.
Abogado di e acusadonan a pidi huez pa tene cuenta cu edad hoben di nan clientenan y abogado Schwengle representando Delanho y Bryson representando Jean, a pidi huez pa tene cuenta tambe cu e hecho cu nan no tin carchi di castigo.
Huez a bay di acuerdo cu exigencia di fiscal, pues el a duna nan 120 dia, di cual 34 ta condicional.
