Home General Den Pueblo Pdr A Haya Pregunta Pakico Mester Paga Deposito Na Elmar

Den Pueblo Pdr A Haya Pregunta Pakico Mester Paga Deposito Na Elmar

1
0
SHARE
- Advertisement -

Lider fraccion cu serie di pregunta pa minister:

ORANJESTAD (AAN) — Ayera mainta a tuma lugar e conferencia di prensa di Partido Democracia Real, y manera custumber su lider politico mr. Andin Bikker, a hiba palabra.

El a cuminza pa expresa palabranan di condolencia na miembronan di prensa cu e perdida di nos colega sr. Demetrio Maduro. Bikker a señala cu e tabata un persona cu un trayectoria largo den prensa, y cu sigur, nos pueblo lo sinti su falta. “Cu sr. Maduro sosega den braza di Señor”, el a expresa.

Seguidamente, mr. Andin Bikker a menciona cu tur diasabra PDR ta drenta pueblo y asina ta conversa cu nos ciudadanonan den diferente distrito, pa di e manera aki wak kico ta bibando den nos comunidad.

A base di esaki, como Parlamentario y lider di fraccion di PDR, el a formula varios pregunta na e mandatario encarga cu energia, pasobra den pueblo e pregunta ta keda, pakico nos poblacion mester paga deposito na ELMAR.

“Pasobra ELMAR ta un compania cu practicamente bo ta mara na dje, bo no tin otro opcion, y e tin e prerogative cu si bo no ta paga e cuenta di coriente e por corte y e ta hacie tambe.

“E ora ey, e pregunta den pueblo ta di con mester mantene un deposito asina halto cu mester ta igual na un luna di consumo, y pa colmo bo no ta haya interes riba e suma ey tampoco.

“ Canando den pueblo, loke pueblo mester di dje aworaki ta un alivio, nan mester di nan placa di belasting bek y nan mester di un estimulo economico”, mr. Andin Bikker a remarca.

El a trece dilanti tambe cu por corda cu Gobierno Mericano, como aña y mey pasa, a dicidi di duna tur su ciudadanonan un suma, cu segun’e ta 200 dollar den nan man, pa por stimula e economia.

“ Den e caso aki, nos a sinta pensa con nos por yega na un efecto comparable, y den nos concepto e deposito cu nos tin na ELMAR, lo por logra di yega na e efecto eynan”, mr. Andin Bikker a subraya.

Esaki debi cu practicamente su hendenan cu ta debe, virtualmente no ta existi, pasobra e riesgo cu e clientenan ta keda sin pague ta inexistente pasobra pueblo ta mara na dje, e ora ey e deposito por worde baha, y alomenos mitad por worde duna na pueblo bek, y di biaha pueblo ta haya loke ta di dje mes, pasobra su placa e ta, segun e Parlamentario.

“ Y e otro mitad, mi ta sigur cu si ELMAR deposite den un banco of den mercado di capital, y cu nan ta gana interes riba dje, e pueblo mester beneficia directamente tambe di e interes ey”, mr. Bikker a remarca.

Riba e aspecto aki el a manda un serie di pregunta na Minister di Energia.

- Advertisement -

DUNA COMENTARIO

Please enter your comment!
Please enter your name here