Diario Online

Dialuna atardi e parha blou di KLM lo pisa suelo bek di Aruba

Publication: Saturday, 30 January 2010. Categoria: General

Gobierno a logra:
Aruba ta yama KLM un caluroso bon bini
ORANJESTAD- Na 2008 durante e gobernacion anterior KLM a dicidi di para tur su vuelonan pa Aruba for di 29 di maart 2009. Asina cu e gobierno nobo a sinta a cuminsa deliberacionnan cu KLM pa trata na convence e compania prestigioso aki pa tin Aruba bek como su destinacion.
Gobierno a logra y dialuna awor KLM lo ta bek na Aruba. Esaki danki na e esfuersonan grandi y e forma decente di actua di gobierno di Aruba. Un logro inmenso den menos di tres luna di gobernacion.

Ta cu masha tristesa Aruba henter a ricibi e noticia na 2008 cu KLM a dicidi di lo no tin Aruba mas como destinacion for di 29 di maart 2009. KLM cu a bula Aruba pa 70 aña sin interupcion a dicidi dor di e mal relacion cu e tabatin cu e gobierno anterior pa para tur su vuelonan pa e isla aki. KLM a mantene si tanto Corsow como Boneiro den su itinerario.

Den su programa di gobernacion partido AVP a pone cu e lo trata na tur forma pa convence gerente di KLM pa nan regresa Aruba. Esaki a bira un meta grandi pa e gobierno nobo y mesora cu el a sinta a biaha pa Hulanda pa delibera cu gerente di KLM pa cumpli cu e promesa aki. Esaki a sosode tambe y dialuna awor, dia 1 di februari 2010 KLM lo ta bek na Aruba.

Prome cu KLM sali rumbo pa Aruba, lo tin un ceremonia na Schiphol na unda lo ta presente e director di KLM sr.Hartman y Minister di Transporte Camil Eurlings. Di parti di Aruba lo tey naturalmente Prome Minister Mike Eman y tambe Minister di Economia, Asuntonan Social y Cultura sra.Michelle Hooyboer-Winklaar.

Durante e ceremonia aki e personanan menciona lo hiba palabra pa entre otro accentua un bes e importancia di e regreso di KLM pa Aruba.

Cu presencia di Minister Eurlings gobierno Hulandes kier demonstra con importante e ta haya cu e relacion entre KLM y Aruba a keda reestablece.

Riba e vuelo inaugural aki lo biaha diferente persona ilustre, manera e vice-presidente di KLM sr.Willem de Jonge kende ta responsabel tambe pa “Government and Institutional Affairs”.
A bordo lo tin diferente manager di seccion di KLM, periodistanan y varios invitado.

Na Aruba nan lo wordo ricibi pa Minister di Turismo sr.Otmar Oduber y otro dignatarionan Arubiano y tambe diferente invitado. Aruba ta di fiesta, pasobra e ta un dia importante pa su futuro y e futuro di generacionnan pa bin.