E “DEFENSA” DI UN CORUPTO!

For di Miami…
Tin hendenan cu ta cubri Corte y cu den algun caso ta troce loke a ser bisa o ta inventa loke no a ser bisa. Ningun momento durante tratamento di e caso cu Marisol a lanta contra DIARIO, mi a compromete mi mes cu Huez pa no bolbe mete cune! Mi a mara mi mes na e condicion inherente na e sugerencia di e Huez pa djis publica e cabez cu el a redacta riba prome pagina y pa no haci ningun comentario acerca e dia ey! Mi a cumpli cabalmente cu e sugerencia di Huez.
Marisol, di su parti, a compromete su mes pa no exigi rectificacion y pa distancia su mes di cualke otro exigencia relaciona cu e caso. Na lugar di cumpli cu su parti, ata shon corupto a kere cu e ta participando den un obra di Mascaruba y a bay complica su mes den un show extenso na radio, television y prensa. El a convoca hasta dos conferencia di prensa sigui, loke a provoca nos reaccion inmediato.

Cu e kier bolbe bay molostia Huez? E dal bay, pero e biaha aki no ta bay trata di e caso di cero Colorado so (cu tambe ta un ehemplo claro di corupcion, aunke e pruebanan concreto no a ser presenta), sino di tur e casonan di corupcion cu el a comete y pa cualnan si tin evidencia! Y DIARIO ta bay proba (na Hulandes e biaha aki!), con corupto e tabata.

No mester perde for di bista cu e mal uso di un posicion di poder pa faborece bo mes o cualke otro persona familiar o amigo, ta corupcion categorico! Esey el a comete den hopi caso, y nos ta bay publica nan un pa un na Hulandes, pa esnan cu no ta comodo cu Papiamento por mira y lesa e evidencianan pa nan mes. Nan no ta bay tin mester di nos pa splica nan, sino cu nan ta bay por analiza pa nan mes, a base di e evidencianan cu nos ta presenta, e actonan di corupcion di Marisol
E mademoiselle aki ta demostrando cu e no ta un persona inteligente; e tabata tin e oportunidad pa saca su mes di e problematica di su maneho, pero pa un capricho personal, o un mal conseho di su ayegadonan, a bay den un aventura cu ta saliendo e malo.

E caso ta importante pa nos pasobra e mester sirbi como un precedente pa tur otro persona cu ta ocupa cargonan publico evita di actonan similar. No ta pasobra un financiador a hinca placa den e campaña di un politico esaki mester faborece cu e propiedadnan di Pueblo mas caro, sin brinda otro miembronan di comunidad e oportunidad di competi pa nan!

Mi tin e impresion fuerte cu Marisol ta aspirando bira lider di MEP, y pesey kier libra su mes di loke e mes a produci como factor negativo durante su maneho como Ministro. E ta teniendo bon na cuenta e presencia di Evelyn y otro candidatonan fuerte pa e posicion cu e lo ta aspirando. Caminda e ta ekiboca ta den su creencia cu si e bay den un fandango publico cu no ta faborece, y e tene un maraton di blablabla, e ta bay logra su acometido.

Shon corupto mester por compronde cu su postura, su falta di cumplimento cu su palabracion cu Huez, y su trocemento di e berdad, ta traha completamente contra dje. Ta precisamente e actitud ey di inmaculado ora cu su violacionnan di bon gobernacion ta contradicie abiertamente, cu e mes ta manteniendo bibo e recuerdo di tur e abusonan cu el a comete como Ministro! Y cada un di nan tin un nomber: ”corupcion”!