Home General E Situacion Tenso Den Nos Region Ta Keda Un Preocupacion!

E Situacion Tenso Den Nos Region Ta Keda Un Preocupacion!

0
0
SHARE
- Advertisement -

paul_croes_2009_ddrs. Paul F.T. Croes, Parlamentario pa fraccion di AVP

ORANJESTAD (AAN): Segun Parlamentario Paul Croes, recientemente por a tuma nota di declaracionnan for di nos pais bisina Venezuela, encuanto di un invasion di e espacio areo di Venezuela door di un avion di FOL. Banda di e base military na Aruba tin un base militar (Forward Operation Location) situa na Curacao.

   E declaracionnan aki tabata den un tono hopi fuerte dirigi na autoridadnan di Aruba y Antiyas pa e supuesto susedido. E situacion tenso aki, banda di e escalacion entre Colombia y Venezuela ta preocupa nos hopi. Nos pais ta sumamente vulnerabel pa e tipo di situacionnan aki. Nos pais cu ta casi totalmente dependiente di turismo, lo sinti efectonan di inmediato si acaso e situacion sigui escala.

Na e momentonan aki nos pais bisina no conoce su mihor momento internamente, E situacion social, di seguridad y tambe energetico ta uno bastante dificil. Analistanan politico tambe ta mira e maniobranan di Gobierno Venezolano como uno pa desvia atencion for di e problema interno cu e pais ta pasando aden.

Como representante di pueblo di Aruba, ta nos tarea pa informa nos mes si Gobierno di Aruba ta consciente di e peliger cu un escalacion asina lo nifica pa nos isla. Nos lo haci preguntanan na Minister di Asuntonan General y Gobierno riba e comunicacion den Reino riba e topico ariba menciona. Tambe nos ta desea di sa ki rol diplomatico Reino por tin den un situacion asina delicado. Un bes mas teniendo en cuente tur e interesnan cu ta hunga pa Aruba (y Antiyas) si acaso e escalacion continua. E preguntanan lo keda dirigi na Minister President, pa den cuadro di Reino y instancianan internacional pone esaki riba e agenda politico.

E tratado di FOL a keda firma entre Reino Hulandes y Merca cu e proposito principal operacionnan netamente pa combati e trafico illicito di droga. Ningun momento e basenan FOL tabatin e intencion di fungi pa operacionnan militar. Esaki mester ta hopi cla pa e Gobierno Venezolano. Nos ta preocupa cu e desaroyo politico den nos region, y nos no mester sinta warda riba e efectonan pero trata na un forma diplomatico pa haya oido di e actornan envolvi. For di Parlamento nos lo sigui e desaroyonan aki di cerca, pa eventual efectonan di e crisis politico cu ta sosodiendo.

- Advertisement -

DUNA COMENTARIO

Please enter your comment!
Please enter your name here