Home Estilo Exposicion “Guadirikiri” Di Stan Kuiperi Na Westin Aruba Art Gallery Te Fin...

Exposicion “Guadirikiri” Di Stan Kuiperi Na Westin Aruba Art Gallery Te Fin Di Januari 2010.

2
1
SHARE
- Advertisement -

expo_stan_kuiperi_ORANJESTAD (AAN): Te cu 27 di Januari 2010 ainda publico por presencia un coleccion di obra di arte nobo di e pintor Arubiano Stan Kuiperi na Westin Aruba Art Gallery.

E exposicion ta titula “Guadirikiri”, y e coleccion ta inspira pa e pinturanan original di Indian riba baranca y den cuebanan di Aruba.

 

Stan Kuiperi a crea un coleccion di obranan di arte cu ta concientemente inspira pa un aspecto fisico di Aruba. Dos aña pasa e pintor a crea obranan cu a enfoca riba e naturalesa di Aruba, specificamente pa concientisa tocante desaparicion di e cadushi largo.

E biaha aki a enfoca riba e arte di e nativonan precolombino na Aruba, e expresionnan cultural y visual mas antiguo di nos historia y cu tambe ta core peliger di desaparicion. Cada cuadro tin un imprenta exacto y unico di un dibuho original.

   Creando obranan di arte moderno, inspira pa e diseñonan original, geometrico y abstracto di e prome habitantenan di Aruba, Stan Kuiperi ta combina e mundo misterioso y desconosi di e cultura mas antiguo di Aruba cu materialnan, un espacio y un publico moderno y sofistica di siglo 21.

   E obranan riba papel ta presenta un bista nobo riba e pinturanan di baranca. Trahando cu un tecnica mixto cu ta inclui pintura, imprenta di linoleo y dibuho, e pintor a crea varios serie. Cada un ta hiba como titulo e lugar caminda ainda por haya e pinturanan, manera Fontein, Ayo, Sero Canashito, etc.

Asina e arte mas antiguo di Aruba, cu ainda ta warda su secreto pa nos, ta rebiba y demostra su poder visual. Esaki ainda ta mes vital y original cu dia a crea nan, mas o menos mil aña pasa, na cuminsamento di e historia di e isla Aruba.

  Riba e potret por mira “Canashito II” – Pintura acrilico y imprenta di linoleo riba papel, 50 x 70 cm.

   Por bishita e exposicion “Guadirikiri” den lobby di Hotel Westin tur dia continuamente di mainta te anochi. Tambe por yama 743 4008 of 594 3282, of bishita www.aruba-artgallery.com of www.stankuiperi.com

- Advertisement -

1 COMMENT

  1. E articulo aki lo cuadra mihor den e categoria “CULTURA” den lugar di “Estilo y Eventos”. En todo caso, danki na Diario pa publica esaki, e exposicion ta habri tur dia te mas o menos 11 pm! Varios hende ta come un bon dinner na Blossoms, despues bai dal un keiro den lobby di Westin, scucha musica life y bishita e Galeria, unda tin amplio lugar di sinta den sofanan dushi y gosa di arte di Aruba original, profesional y di nivel internacional! (“A Work of Art is a Joy Forever!”)

DUNA COMENTARIO

Please enter your comment!
Please enter your name here