Diario Online

Grupo di Colombiano a paga Pa proceso di screening y test psicologico

Publication: Diasabra, 30 Januari 2010. Categoria: General

Lamentablemente, recesion economico a para renovacion Playa Linda
Segun director di Human Group sra. Duque!
ORANJESTAD (AAN) — Manera ta conoci, varios luna atras, un delegacion di Aruba a bay Colombia en busca di trahador den construccion, relaciona cu expansion di un time sharing.
Como cu e proyecto no a bay door y aparentemente, e trahadornan cu a cumpli cu tur rekisito pa bin na remarca, despues di a paga un suma (mas of menos 230 dollar) no a worde poni na haltura cu e proyecto no ta sigui, DIARIO a ricibi yamada, den forma di denuncia, di un di e candidatonan (ken ta actua manera vocero) cu tabata un grupo di seis persona.
Awe DIARIO ta trece un relato fiel na e informacion cu nos a logra di compila.
Pa traha un relato responsable nos tin cu apunta fuentenan di informacion y menciona di cual proyecto ta trata.

Esaki tabata e renovacion di Playa Linda, unda un instancia na Colombia a worde envolvi: esta, Human Groep di Universidad San Buenaventura di Cali, cu a ser bishita pa gerente di Playa Linda y un funcionario di Departamento di Labor.

Ayudo legal a worde pidi, eventualmente, na Bufete di mr. David Kock, si en caso e personanan lo por a bin Aruba, worde yuda cu e aspecto di e permiso temporal di trabao. Pero esaki ta tur, ya cu e grupo no a bin, mr. Kock no tin envolvimento mes den e proceso.

E prome persona cu DIARIO a acerca ta sr. mr. Jan van Nes, ken te ainda no por a concede nos un entrevista riba e caso aki. Via su secretaria so, el a laga nos sa cu e no ta buscando hende di afo, pasobra tin contratistanan local interesa.

Nos ta interesa si pa haya sa si e proyecto riba su mes lo cana su caminda den futuro, y den e sentido aki ohala e por haci un espacio den su agenda druk, pa duna nos un entrevista.
Nos a acerca tambe Departamento di Labor cu a forma parti di e delegacion y nos a haya un poco informacion.

Ta bon mes cu DIARIO por trece un aclaracion y nos ta spera cu e trahadornan concerni na Cali tambe por compronde e situacion y haya e informacion cu, segun e vocero, nan no a ricibi.
Sra. Maria Eugenia Duque Lopez, directora di Human Groep Colombia, a informa nos cu e seleccion a worde realiza bao e programa “Talentos Colombianos”, cu a worde introduci na 2009, y cu tin e meta di yuda hendenan di Colombia haya trabao den otro pais unda nan por haya e oportunidad di kizas, gana un entrada mas halto.

Sra. Duque Lopez a agrega cu e situacion di recesion economico a hunga un rol importante cu lamentablemente e proyecto no a sigui te aworaki.

Encuanto e suma cu e candidatonan a paga, sra. Duque Lopez ta señala cu nan a acepta pa hiba a cabo henter e proceso, no solamente pa e seleccion pero tambe riba e capacitacion riba e tema di migracion pa obtene un salida for di Colombia di manera legal y ordena. Pa e motibo aki nan a paga.

Ta bon pa enfatiza cu Abogado mr. Kock no ta envolvi den e proyecto, pero el a splica nos tog, cu Human Group ta un instancia cu ta haci investigacion completo pa cada persona cu lo kier emigra pafo di Colombia pa trabao.

Esaki ta un facilidad cu nan ta brinda en general, na tur compania cu ta solicita nan servicio. Pues, no pa Aruba so.

Nan ta haci un trabao hopi amplio door di investiga no solamente e aspecto penal, pero tambe e ambiente den cual e persona ta biba, ken e ta, di cual famia e ta bin, cu ken e ta biba den su cas, y e tin entendi cu tambe nan ta haci un evaluacion psicologico.

Ora e resultado ta cla e empleador por ta sigur cu e trahadornan cu e ta bay haya ta bon, pasobra e no ta basa su mes riba locual e candidato ta bisa pero riba e resultado di un screening y di un test psicologico.

Den e caso di Playa Linda, anuncio a sali den noticiero den television na Colombia como tambe via internet, bisando cu tin un proyecto di construccion di hoteleria, y cu nan mester di tal y cual funcion, y di e manera aki e candidatonan a solicita.

Pa loke ta trata Departamento di Labor y otro informacion adicional cu DIARIO a logra di haya, por lesa esaki den articulo apart.