Home Hudicial Huez A Dicta Na Fabor Di Gobierno, Den Caso Di Vergunning Pa...

Huez A Dicta Na Fabor Di Gobierno, Den Caso Di Vergunning Pa Taxi

0
0
SHARE
- Advertisement -

ORANJESTAD (AAN): Diaranzon huez a duna su sentencia den e caso cu 26 persona a entama contra Minister di Transporte, despues cu nan a worde nenga di haya un permiso pa core taxi.

En total 52 persona a haya un toezegging for di Minister anterior Edison Briesen, pero Gobierno actual no a respeta e toezeggingnan aki y no a duna e personanan e vergunning pa core taxi.

Pesey 26 di nan a lanta un caso sumario y esaki a tuma lugar dia 29 di December.

Huez Diaranzon a dicta na fabor di Gobierno, nengando e peticion di e 26 personanan.

Abogado Anthony Ruiz kende a representa e 26 personanan a splica DIARIO cu nan a lanta e caso, debi na e hecho cu Minister Briesen cu tur su derecho a duna nan e toezegging pa nan haya nan permiso, door cu turismo a aumenta bastante, durante e 10 añanan den cual no a duna permiso mas pa core taxi.

Ruiz a splica cu e Minister actual a nenga di duna e permisonan pasobra e ta haya cu e toezegging-nan ta contra ley y cu e momento cu Briesen a duna e toezeggingnan no tabata apropia.

El a splica tambe cu segun Minister Otmar Oduber, ya caba tin suficiente taxista riba nos isla.

Huez den e caso sumario a dicta contra e 26 personanan, pero door cu e ta un caso sumario, huez a no a haya chens pa bay riba e caso na un manera amplio.

Esaki segun abogado Ruiz, kende a sigui bisa cu huez den e sentencia a bisa cu usando e informacion cu e tin y e rol cu e tin, e no por bisa cu siguranza cu e hendenan aki ta bay gana nan caso.

Ruiz a splica cu e huez a pone cu e como huez di caso sumario ta prefera pa un huez di un caso normal (‘bodemrechter’) dicidi riba e caso.

Segun Ruiz no ta asina cu e caso a termina awe, e tin cu sigui.

E argumentonan cu el a uza pa no duna e hendenan aki nan vergunning ta cu durante ultimo 18 añanan turismo no a aumenta asina drastico cu tin mester di mas taxista.

Segun Ruiz esaki ta hopi straño pasobra el a bin cu documentonan di CBS cu ta mustra cu despues di 1997 te awor, turismo a aumenta cu 100%.

- Advertisement -

DUNA COMENTARIO

Please enter your comment!
Please enter your name here