Diario Online

Laptop-Melding na aeropuerto a pone pasaheronan bira furioso

Publication: Friday, 29 January 2010. Categoria: General

Pasaheronan abordo di Copa Airlines…
Acto di Polis ta hustifica of no?
ORANJESTAD (AAN): Loke a pasa Dialuna 18 di Januari 2010 abordo di e vuelo di Copa Airlines cu a sali for di Aruba, a laga pasaheronan furioso, hopi disgusta, y keto bay rabia! DIARIO a tuma nota riba Internet, cu e vuelo di Copa Airlines for di Aruba pa Panama, tabata precisamente na ora! Nan a worde aborda na tempo, y tur hende a sinta den stul cu nan seatbelt bisti. E avion a worde hala for di gate, y asina e piloto di e avion a cuminza taxi bay na comienzo di pista, pa asina haya autorizacion di ATC di Curacao pa lanta vuelo.
Inesperadamente, mientras e avion ta riba pista caba, cla pa subi, diripiente e avion a cuminza bay dilanti, pero poco-poco! Pasaheronan a cuminza wak otro, y no ta compronde kico ta pasando.

E ora e Capitan a duna informacion, cu nan a worde instrui door di Autoridad di Aruba, pa regresa Plataforma pa un investigacion.

Pues e avion a bay bek na Gate, unda porta a habri y dos agente policial a drenta! E agentenan policial a drenta, a cana bay mey-mey di e avion, directamente na un asiento unda un dama ta sinta.

Kico Polisnan kier a sa di dama? “Nos kier sa si bo Laptop Computer ta un Compaq”.
E dama a keda sorprendi totalmente, y no ta compronde kico ta pasando. El a saca su Laptop Computer, y un agente policial a rek man y tume. E Computer ta di marca HP.

Aparentemente Polis a dicidi na haci un investigacion riba nan mes relaciona cu un “Laptop Computer Compaq” y a pone full un avion, cla pa lanta vuelo regresa plataforma… y bin descubri cu e computer ey no tey?

Te ainda no tin claridad, kico Polis a bay haci abordo enbusca di un Compaq Computer. DIARIO no a ricibi nunca un boletin di Grens Politie di loke a pasa dia 18 di Januari na Aeropuerto. Masha poco biaha sa haya dato di casonan asina.

Pero di con Polis a bay “all out” pa pone un avion regresa bek… creando un “delay” di otro mundo y pa colmo haya un daks den wowo?

Halto Comisario di Polis ta na altura di e blunder aki? E por splica di con cualkier otro ciudadano cu perde un Laptop Computer, tin di bay den e proceso largo di bay te na Recherche pa haci denuncia, y despues warda pa e investigacion start?

Grens Politie di Aeropuerto a ricibi un denuncia mes? E actitud di nan cu e vuelo, a crea problema grave pa e pasaheronan, y kico nan lo bisa despues: “Ooops, sorry?”

E avion di Copa Airlines debi na esaki, a sufri un retrazo di 50 minuut! Pasaheronan abordo di e avion a keda furioso! Nan a cuminza grita cu voz halto, ta ki clase di Polis tin na Aruba!!!! Otronan a bira nervioso, cu nan lo bay perde nan “connecting-flight” na Panama City.

Algun pasahero a spanta, ora cu e Capitan a bisa cu nan tin di debolbe na Plataforma pa un “investigacion di autoridad”… nan a kere cu ta un BOM-MELDING tabatin. Pero awor a resulta cu ta un LAPTOP-MELDING bochornoso.

Di con Polis a haci e cos aki? Pa un Laptop Computer cu costa $499 awendia, nan a crea un retrazo enorme pa tur pasahero…? E ta hustifica?

Ban spera cu cualkier ciudadano cu e siman aki entrega un denuncia di Laptop horta na Recherche, haya mesun “reaccion” di oficialnan di Recherche. Of kizas ta na Grens Politie awendia bo tin di bay entrega denuncia di Laptop horta? Pasobra nan si ta move tera y avion pa recupera esaki.

E potretnan aki, cu DIARIO a obtene via Internet di pasaheronan keto bay furioso cu e fayo di Polis aki, ta mustra momento cu Polis ta interogando e pasahero femenino, kende a sinti su mes masha humilia mes pa e acto aki. Pa colmo, tin algun pasahero kier a sa si acaso un polis si mag di subi un avion cu pistol den nan poder.