Mariniernan a finaliza nan yudanza na Haiti
ORANJESTAD (AAN): Despues di diesun dia intensivo di yudanza, e seccion di Marinier Hulandes a stop cu nan trabao na Haiti. Ta conoci cu e isla di Haiti a worde azota dia 12 di Januari door di un temblor pisa cu un magnitud di 7.0 riba scala di Richter. E epicentro tabata na 25 kilometer di Port-au-Prince. Segun calculo, mas di 150.000 hende a fayece den e desastre, y parti grandi di e infrastructura a worde destrui. NOODHULPDETACHEMENT: Un poco despues di e tragedia, Ministerio di Defensa a manda nan barco Hr.Ms. Pelikaan pa Haiti.
Abordo di e barco tabatin diescinco miembro di tripulacion, un detachement di 45 marinier di 32 infanteriecompagnie di Mariniers di Aruba, e grupo di boto Aruba, seis militar di Arumil, y dos colaborador di Marechaussee Real.
E detachement a worde sosteni ademas cu personal di logistica, tecnico, y medico di e Commando der Zeemacht na Caribe Hulandes. Pa diesun dia e grupo a traha pa yuda hende na e isla.
ENFOQUE: Unda e focus primordial tabata poni, tabata pa haci e Waf di Port-au-Prince accesible back. Despues a pasa over pa eschoolta convoynan, repartimento di alimento, y ehecuta patruyahe.
Na diferente lugar na Port-au-Prince e mariniernan a reparti cuminda y awa. Tambe nan a suministra cuminda na diferente Cas di Huerfano y Hospital. Aki nan a duna remedi, cuminda di emergencia, pakete di cuminda, awa, y bruki.
Mariniernan a eschoolta tambe un grupo di 106 mucha huerfano di Haiti di e cas “God’s Little Angels” pa aeropuerto di Port-au-Prince.
Tambe e team di Urban Search and Rescue (USAR) Hulandes a worde eschoolta ora di ehecuta trabao di buskeda.
E ultimo dianan, e grupo di Marinier a transporta como 1.000 shelterbox na diferente lugar. Den cada box tin comestible primordial pa diez persona, manera un tent, un lona pa pone abao, laken termico, un stoof, material di cushinamento, herment, net contra sangura, y container di awa y tabletnan pa purifica awa. Cu esaki, miles di Haitiano a haya chens di haya shelter.
PELIKAAN: E barco Hr.Ms. Pelikaan a demostra cu su reputacion como e ‘workhorse’ di Marina Hulandes tey ainda! Despues di e transporte inicial di e grupo di Marinier, hunto cu 21 palet cu cuminda, dos vehiculo di carga, 4 LandRover, cinco boto di rubber Zodiac, y cuatro Boston Whalers di e grupo di Aruba na Haiti, e barco a transporta 15.000 kilo di material di yudanza, y 45.000 kilo di material di e team Mericano cu a worde busca di Cuba y hiba Haiti.
Den regreso, Pelikaan a duna e cutter Mericano, USS Oak cu 25.000 liter di awa potable. Despues e barco Hulandes a bay busca 200 palet di material for di e base di Guantanamo Bay na Cuba pa entrega na Haiti.
Tanto Ministro Hulandes di Defensa Eimert van Middelkoop (cu via telefon a papia cu comandante di Pelikaan), como tambe e Comandante nobo vice-admiral Matthieu Borsboom ta orguyoso cu e trabao di e homber y muhernan na Haiti.
