Home Editorial Mas disparate di Nel!

Mas disparate di Nel!

1
0
SHARE
- Advertisement -

jossy_mansur_pic             Como cu e no a keda nada satisfecho cu e resultado di eleccion November pasa, y despues di a traiciona su votadornan buscando refugio de un anonimato pa yora su pena, na lugar di asumi su puesto den Parlamento pa presenta bataya pa nan beneficio, awor el a cuminza haci e papel di mago: mescos cu en coneu bao e sombre, un rato e tey, djey e ta somenta sin laga hueya!  Ningun hende sa di unda e ta surgi asina repentinamente, y tampoco unda e ta bay cu mesun prisa.

              E unico cos sigur ta cu den cada aparicion su boca ta sigui laga su cerebro atras, no pasobra e no sa miho, sino pasobra e no kier demostra cu e sa con actua y papia miho.  E ta un caso insolito dentro di e panorama politico di Aruba, y un enigma di contradiccion poco biaha iguala den analnan di e mundo politico di nos isla.

                E contradiccion ta radica den e hecho cu el a saca masha hopi voto, bastante mas cu biaha pasa,  y cu el a logra conserva su partido un total di 19 mil y pico voto, pa djey misteriosamente bandona e logronan aki den aras di un decepcion grandi pasobra AVP a clabe un  12-8 categorico!  Parce cu pe no tabata importante tur e miles di hendenan cu a vota pe, pasobra si e tabata por lo menos agradecido, e lo asumi su responsabilidad di representa nan den Parlamento, unda e por a demostra tur e habilidadnan politico acumula durante su trinta y pico añanan den ramo!

                   Den su ultimo intervencion na radio o television parce cu el a cuminza agita Pueblo pa lanta contra e Gobierno actual, como si fuera un soldat fugitivo cu a bandona e campo di bataya por tin influencia riba su seguidornan!   Mientras e tabata den Gobierno, ocupando un posicion for di cual e por a impone orden y respet,  el a opta pa haci net lo contrario, o sea  ‘laat de boel maar waaien’,  y a concentra riba con pa enrikece su ayegadonan riba custia di Pueblo.   Pa Nel, parce su historia, civilizacion y libertad tabata bal menos cu e carteranan cu e mester a percura yena pa e por a conta cu nan apoyo.

                         Tur e cosnan ey a envilece Nel, pero a yena alavez e saconan di friends and family cu e codiciado rikeza.  E culto di agradecimiento cu nan a lanta rond di dje, y nan cantonan di Gloria na dje a hacie sinti su mes un moderno heroe, aunke nan no a logra sake di su mediocridad o di e nulidad di su Gobierno di ocho añanan di desperdicio.   Nan, mescos cune, a keda intelectualmente mes pober y scur cu e tamaño di nan cerebronan.   E realidad sunu ta cu bao e guia di Nel nan tabata tey pa gana placa,  no pa traha pa Pueblo,  pasobra ta nan pasantia den Gobierno a produci e daga asesino di e presupuestonan familiar:  B.B.O.

                       Awor Aruba tin un Gobierno cu Pueblo a elegi cu e mayoria di su votonan, invocando un cambio di rumbo via un Gobierno decisivo y eficaz.   E  ta cosechando caba e frutonan, pasobra mitad di e maldicion a ser elimina recientemente y e otro mitad di e maldicion  a ser elimina pronto.   Tin speranza atrobe cu turismo ta bay lanta cabez pa colma nos hotelnan y restaurantnan cu bishitantenan cu a yega di disfruta di e encantonan di nos isla, o kier bin experience segun loke nan a tende  y mira na television y den revistanan specializa den viahenan vacacional.  Tur cos ta indicando cu futuro por encera e cumplimiento di e deseonan di Pueblo pa normalidad, bienestar y progreso.

                        Nos relacionnan cu Hulanda a mehora drasticamente, loke ta crea e speranza cu nos por conta cu su ayudo ora e ta necesario.  Den e gobierno aki no tin ningun “sabelotodo” cu na lugar di dialoga cu e politiconan Hulandes ta opta pa zundra nan y den un tono despectivo ofende pa nan sin ningun necesidad o razon,   manera tabata e caso te November aña pasa! Hulanda ta nos aliado, no nos enemigo! Cune mi ta tinti cu Aruba tin tur cos di gana, y sin dje, tur cos di perde! E no ta un postura sumiso, sino uno consono cu mi nacionalidad y mi sentimientonan.

- Advertisement -

DUNA COMENTARIO

Please enter your comment!
Please enter your name here