Mighty Hippy a worde admiti tog pa Roadmarch
BREAKING NEWS
ORANJESTAD (AAN): Simplemente bisa, SAC, huradonan, y e timekeepersnan a pifia formal! Resultado di esey ta cu SAC a admiti su eror, y awor a permiti pa Mighty Hippy participa tog den Final di Calypso y Roadmarch awenochi.
Den prefinal di Calypso & Roadmarch Contest 2010 e cuerpo di hurado a aplica reglamento y duna 100 strafpunten na Mighty Hippy. Argumento tabata cu segun e time-keeper e pre-show a pasa 1 minut.
Despues di prefinal NBO a entrega su protesta na SAC contra e decision aki, cual protesta SAC a studia y analisa detayadamente. E tecnico di zonido, sr. Jason Inesia, y representante di SAC encarga cu e parti musical di e festival, sr. ing. Ralph Croes, a realisa e investigacion.
Nan conclusion ta lo siguiente: NBO a demostra cu e pre-show di e cantante en cuestion ta den e margen di e reglamento, esta menos cu 1 minut.
A base di e resultado di investigacion y e maneho di “fair play”, SAC ta asumi e responsabilidad y ta kita e strafpunten duna na Mighty Hippy.
Consecuentemente e cancion Hulk (roadmarch) su total di punto ta bira igual cu e cancion na di 20 lugar (You ain’t stopping me). Y door cu ya a anuncia 20 cancion participante, lo no ta eticamente corecto pa kita un di nan. Pa tal motibo SAC ta dicidi cu e Calypso y Roadmarch Contest 2010 lo consisti di 10 calypso y 21 roadmarch.
