Pa alivia trafico temporalmente por haci uso di rifstraat pa sali den Klipstraat
E cambio aki ta keda te cu April ora cu e trabaonan ta cla:
Autonan mal para lo worde kita cu takelwagen di polis, boet lo bin acerca!ORANJESTAD (AAN): Mientras cu e trabaonan ta andando den centro di ciudad pa cu embeyecimento, tin tambe desviacion den trafico cu tur chofer mester tene cune.
E caya pariba di Ministerio Publico cu ta Rifstraat antes trafico tabata bay zuid. Entrante diabierna cu a pasa tur trafico por drenta Rifstraat bay nort y yega den Klipstraat bay na man drechi direccion Driftwood Restaurant. Loke ta un problema eybanda ta e trafico.
Pa tene un idea pa précis den un entrevista cu Richard Kramers specialista di trafico el a splica exactamente riba e cambionan den trafico. El a señala cu e trabaonan ta canando segun plan. Tabata tin cuatro dia cu Caya Betico Croes tabata cera pa trafico. E trabaonan den e area di Schelpstrat-Emmastraat a keda cla y e caminda a worde habri for di Schelpstraat pa bay den Caya Betico y for di Emmastraat tambe Caya Betico ta accesible.
A haci algun cambio chikito riba e situacion di trafico banda di Ministerio Publico cual ta Klipstraat mirando cu tin algun negoshi y cu e fluho di trafico ta un tiki problematico, a bisa. Polis a alivia esaki door di cambia e direccion.
Aworaki por drenta Rifstraat, e caya cu tin entre Misa Protestant y Ministerio Publico bay direccion nort y sali net pariba di Driftwood of ex Papiamento Restaurant.
E cambio aki ta keda te cu April ora cu e trabaonan ta cla pa loke ta Kazernestraat dilanti di Benetton caminda cu por drenta Klipstraat sin problema. Asina cu e trabaonan aki ta cla y cu por drenta Klipstraat via Kazernestraat lo pone e situacion di trafico manera cu e tabata ta anteriormente, a subraya.
