Personanan cu a haya carta di retiro tabata trahadornan directo den su despacho
Minister di Husticia ta considera esaki como incumplimento di contract:
Nunca nan a presenta nan a di trabao!
ORANJESTAD (AAN): Gobierno a manda varios carta di retiro pa un grupo di persona cu te awe no a presenta na trabao desde cu e gobierno nobo a presenta. Varios di e hendenan aki tabata resorta bao di ex minister Rudy Croes. Awor e minister nobo di husticia ningun dia so a mira nan na trabao. Den entrevista e mandatario Arthur Dowers a splica cu ta straño con a duna un grupo di hende asina contrato como consehero. Un contrato largo siendo cu nan sa cu e hendenan aki no por bay traha bao di un otro minister cu drenta gobernacion segun minister Arthur Dowers.
E minister a bisa cu e no lo bay over na divulga nomber di ningun hende pero unico cos cu e por bisa ta cu gobierno a manda carta pa algun hende ya cu el a constata cu e persona aki ta riba su presupuesto y cu nan ta trahadornan directo den su oficina, conseheronan y asistentenan personal di dje nan ta pero e no a mira cu nan a presenta ningun dia na trabao.
Tin un contract stipula cu nan lo mester traha, a enfatiza. E hecho cu nan no a presenta na trabao a wordo interpreta como incumplimento di contract. E minister a conclui cu e personanan aki no ta interesa mas pa cumpli cu e contractnan.
Mirando e relacion hopi estrecho cu e personanan aki tin den su oficina e ora e tambe lo acepta nan retiro. Esey ta loke nan a haci tambe e momento aki, a bisa.
E lo tende ora e bin bek Aruba cual ta e reaccion di e personanan aki pero e ta sinti cu e forma con e cosnan aki a wordo regla por ta no a bay di e forma mas corecto lagando contractnan di un minister anterior pa personanan traha den despacho di un siguiente minister, a señala.
E mandatario a manifesta cu mester evalua awor e posibilidad cu tin pa pone e personanan aki den otro funcion si tin e necesidad.
E punto di salida aworaki ta cu si e personanan aki tin un contract individual, temporal pa traha personalmente cerca e minister di husticia y cu nan no a presenta, e minister ta interpreta esey como un incumplimento di e contract y e ta acepta esey tambe, a laga sa.
Si e persona tabata un campañador di e minister of a wordo contrata pa e gobierno anterior e ora ta dificil pa drenta den despacho di e siguiente minister di un otro partido of un gobierno cu otro signature, a agrega.
Segun Dowers e ta wak esaki como un posicion un tiki dificil pa e personanan aki y e ta kere cu pa tal motibo nan lo a dicidi di kibra e contract door di no a presenta nunca na pia di trabao.
