Diario Online

Prome Minister di Aruba Mike Eman a firma contract cu Sparta Rotterdam

Publication: Saturday, 30 January 2010. Categoria: General

E contract ta encera un pakete extenso
ORANJESTAD- –Ayera Prome Minister di Aruba Mike Eman a firma un contract cu e club di futbol Sparta Rotterdam. Cu esaki Aruba ta bira un partner social di Sparta Rotterdam.
Lo tin cooperacion riba diferente tereno. E nomber di Aruba lo bin riba e shirtnan di e hungadornan di Sparta cu ta naturalmente un promocion enorme pa Aruba. Esaki ta entrante juni 2010. Tambe Sparta lo yuda hobennan talentoso di Aruba den un carera riba tereno di futbol.
E hobennan aki lo bai Hulanda pa sigui desaroya nan mes riba tereno di deporte, pero tambe lo tene cuenta cu nan estudio.
For di Hulanda lo bin Aruba instructornan pa duna training na nos hungadornan aki mes.
E cooperacion entre Sparta y Aruba lo ta riba diferente tereno, manera e waf di Rotterdam, e hospital di Rotterdam mescos tambe cu Erasmus Universiteit cu a manda un representante na firmamento di e contract aki.

E ta un pakete extenso y e dirigentenan di Sparta ta spera lo maximo di dje. Sparta ta hungando den division di honor na e momentonan aki cu ta e division mas halto cu tin den futbol paga.
Sparta Rotterdam ta e club di futbol mas bieu di Hulanda cu un tremendo bon nomber y un atraccion grandi.

E stadion ta grandi y Sparta no conoce problema cu su fanaticada. Tur e weganan di Sparta division di honor ta live na television na Hulanda y dirigentenan di Sparta ta bai wak kico ta e posibilidadnan pa por pasa e weganan aki na Aruba tambe.

Na e momentonan aki e weganan ta wordo mira pa mas o menos 1 miyon y mei te dos miyon di televidente. E contract a wordo firma pa e periodo di 4 temporada. Un temporada ta di juni te juli di e aña siguiente.

Ta claro cu tur hende ta spera cu e contract aki por wordo extendi despues pa algun temporada mas. Aruba un bes mas ta den lus positivo cu firmamento di e contract aki cu ta hiba nomber di nos isla hopi leu.

E logro aki ta danki na e vision y determinacion di e gobierno nobo cu apenas tin tres luna na mando.