ORANJESTAD (AAN): Diamars un rueda di prensa a tuma lugar, relaciona cu e desaster na Haiti y e intencion di organiza un radio teleton aki na Aruba pa yuda e victimanan di e temblor. Durante e conferencia di prensa Prome Minister Mike Eman a bisa cu na momento cu nos a haya e noticia di e drama na Haiti, cada un di nos den comunidad a cuminza pensa kico nos lo por haci pa yuda e victimanan y e sentimento aki tabata hopi presente tambe cerca Gobierno. Gobierno a tuma diferente iniciativa y a haya aporte di un base hopi grandi, incluyendo marina di Reino Hulandes.
El a splica cu Diamars merdia ainda e tabata tin combersacion cu Minister Koenders di ‘Ontwikkelingssamenwerking’ di Hulanda cu a duna un gradicimento pa aporte di pais Aruba ta dunando den henter e situacion aki.
E siguiente paso cu a worde pensa riba dje ta pa organiza un radio teleton nacional y pa e motibo ey Rode Kruis a worde puntra pa haci un analisis di kico lo ta e mihor evento pa esaki, pa nos por sigui duna un aporte na e situacion di Haiti y con nos por haci esaki den un forma cu e ta bay tin resultado cu ta worde desea.
Prome Minister a sigui bisa cu Rode Kruis y organizadornan a pensa cu e mihor dia pa organiza e evento lo ta riba dia 25 di Januari cu ta Dia di Betico.
Prome a casi no organiza e evento riba e fecha ey, pero segun Eman, Dialuna anochi el a haya un yamada di yiu di Betico esta Junior Croes kende a bisa cu nan kier pa e evento sigui riba dia 25 di Januari, pasobra nan no tin ningun problema cu esaki.
Durante e conferencia di prensa Eman a pidi publico un aplauso pa tres di e yiunan di nos libertador Betico Croes esta Lalo, Junior y Glenbert Croes, kendenan tabata presente pa sostene organizacion di e evento riba dia di nan tata.
Gissette no tabata presente, pero segun Prome Minister, e tambe ta di acuerdo cu e evento.
Eman a pidi tambe un aplauso pa presencia di parlamentario y lider di PDR Andin Bikker.
“Bunita ta pa constata cu ora e retonan ta grandi, nos pais ta uni na e momentonan fundamental”, segun Prome Minister.
