Home Editorial Sin ningun duda: Marisol ta Corupto!

Sin ningun duda: Marisol ta Corupto!

7
2
SHARE
- Advertisement -

jossy_mansur_pic                Ata mi ta bise bon cla, pa Marisol no carga ningun speranza cu e presentacion di pruebanan contra dje como un gobernante corupto ta bay stop! Ta awor nan ta bay cuminza! Su abogadonan Curazoleño a huy dilanti di Huez pa e multiple documentonan comprobatorio cu nos a presenta, y a desvia e discusion den direccion casi exclusivo di e bagamunderia di Sero Colorado, y cerca Huez a crea e impresion cu ta riba e caso ey DIARIO a basa su acusacionnan di corupcion contra Marisol. Mi por bise sin titubeo: Marisol tabata un gobernante corupto! E diferente casonan cu DIARIO a publica, acompaña pa documentonan legititmo como prueba, ta condene na carga e peso di su infraccionnan contra e concepto mes di bon gobernacion.

                Ayera el a bay den histeria, pretendiendo cu el a gana e caso contra DIARIO, loke no ta berdad! El a logra, via su abogadonan, di convence Huez cu aki ta trata solamente di e caso di Sero Colorado, y no tur e otro actonan di corupcion cu el a comete. Su maluso di su posicion pa faborece abiertamente financiadornan di su campaña, su alevosia den e construccion di e brug di madushi contra e conseho di su propio adviseurnan, su mentiranan relaciona cu e un miyon di Florin cu el a haya di un Offshore di Curacao, cu yama Abundance,  enfin, tur e otro actonan contra e principio di bon gobernacion y cu ta cay den e definicion di loke ta corupcion, ta catalogue como un gobernante corupto.

                Si el a kere cu e avenida cu Huez a habri cu su sugerencia pa e huy di su responsabilidad ta bay salbe, e ta grandemente ekiboca! Ya DIARIO ta preparando caba tur e documentonan den su poder pa ilustra con corupto e tabata den Gobierno!

                Cuminzando pa e miyon di Florin di e oferta di soborno di Namdar dirigi via Michael Williams na dje, te e brug di madushi, bo ta haya entre nan un serie di actonan cu no por ser califica di ningun otro manera cu actonan di corupcion claro. DIARIO lo publica e defincion legal di corupcion y lo demostra cu e documentonan comprobatorio cu e tin, cu no tin scapatoria pa Marisol. E lo ser investiga profundamente pa e team cu lo bin di Hulanda pa averigua con leu e putrefaccion a yega den e Gobierno di Nel Oduber, y Marisol su papel den esey tabata sobresaliente!

                Pa mi, un di e asuntonan mas askeroso di Marisol ta e miyon di Florin di Abundance, cu te awe e no a splica pa libra su mes di sospecha. Ta unda e placa ey a ser deposita na Aruba? Den cua banco? Y pa ki motibo el a “fia” e placa ey for di Abundance? E placa ta na banco ainda of el a invirtie? Den kico? Y di con el a bisa cu ta un ‘herencia’ el a haya? Dios gracias cu su famianan ta bibo y di bon salud! Ningun di nan a laga e cifra gigantesco ey pe. Con?

                El a core cu suerte durante e caso pasobra e Huez cu a presidi no conoce nos idioma y no por a lesa y compronde tur e documentonan cu nos abogado a presenta. E no a ni sikiera bladder den nan. El a djis haci e observacion cu nan no ta na Hulandes, y nos no a haya e oportunidad pa splike cu e motibo ta cu nos no a haya e tempo necesario pa traduci nan pe. Den e siman di Pasco y Aña Nobo esey tabata imposible! Pero, fuera di esey, e no tabata necesario tampoco, pasobra Papiamento ta nos idioma oficial banda di Hulandes for di algún aña pasa, y nos por a presenta nos defensa den nos idioma vernaculo si nos tabata kier.

Mi ta asegura Marisol cu su suerte a yega te ey tambe, o sea te e logro di su abogadonan di limita e caso te na Sero Colorado, poniendo un banda e resto di casonan cu no tin ningun otro splicacion cu esun di corupcion. Esey a convence e Huez pa bin cu un ‘sugerencia’, no un sentencia! Si Marisol no sa e diferencia, ta lastima mester sinti pe! Y asina mes, e caso di Sero Colorado ta bao investigacion atrobe, y DIARIO lo saca un convocatoria pa tur e victimanan di e estafa grandi cu a tuma lugar pasa na DIARIO pa duna nan version di con nan a ser engaña, y cuanto placa nan a perde den e estafa ey.

 Nos tabata dispuesto di laga e asunto para, pero como cu Marisol a dicidi di bay haci beheit cune, comosifuera e a gana e caso, nos ta bay cuminza for di mañan cu e publicacion di TUR e casonan di corupcion den cual e tabata directamente envolvi. Den conclusion: Marisol tabata definitivamente un gobernante corupto!

- Advertisement -

2 COMMENTS

  1. Marisol ami ta kere cu miho cuminsa tuma bo retiro for di politiek pasobra poco poco tur hende ta haya sa e berdad y e cara di yo no fui no ta bai juda bo mas!
    Dus proximo ellecion tene duro paso mas sorpresa ta bin. Ba cai basta caba den voto, cuanto mas lo bo kier bai cai?
    Biba MEP
    100% Fiel
    Keep on dreaming!

  2. hhhhhhhhhhaaaaaaaaaaaa ………… KIKO nos ta hasi sin Diario y Jossy ? DANKI pa informá e PUEBLO asina bon ! Mi ta sigur ku hopi ta aprecia esaki….. Vooral nos Arubiano nan ku ta biba afor !

DUNA COMENTARIO

Please enter your comment!
Please enter your name here