Home General Temblor Fuerte A Lanta Mayoria Hende For Di Soño

Temblor Fuerte A Lanta Mayoria Hende For Di Soño

0
0
SHARE
- Advertisement -

ORANJESTAD (AAN): Pa algun hende, el a pasa sin cu nan a ni ripara!  Kizas e soño tabata profundo, y e resonancia abao di sonido produci pa e muraya temblando, no a spierta nan.

   Pero otronan, incluyendo algun cu ta drumi profundamente, a bula spierta ora cu diripiente cama y henter nan camber tabata tembla.

   E ora exacto e momento ey, tabata 4:14 mas 49 seconde.  Tabata falta 11 seconde pa a bira 4:15 a.m.

   El a cuminza cu un sonido cu ta manera bin di zuid, yega cerca, y cuminza tembla muraya constante.  Bentananan a tril, daknan di zink a produci sonido di bleki, y por a scucha dak-span, y hasta glasnan den cashi di cushina ta tril fini.

   Un temblor di 4.2 grado, riba scala di Richter a spanta miles di hende e madruga ey na Aruba.  Pa ora cu e temblor a stop y cu hendenan a wak holoshi, ya caba 4:15 a.m. a drenta.

   E temblor mes, a worde localiza na latitud 12.21º Norte y longitud 70.02º West.  Esaki ta como 27 km. zuidwest di San Nicolas.

   Bo por tume tambe como 31 km. straight zuid for di Aeropuerto di Aruba.  Otro punto di referencia, ta 34 km. na zuid-oost-zuid di Oranjestad.

   E epicentro tabata na 12.2 kilometer bao di superficie di laman.

   Tres reportero di DIARIO, den diferente distrito, a nota, cu como algun minuut prome cu e temblor aki, a sinti uno mas leve.

   “E temblor leve aki, lo a pone hopi hende spierta sin cu nan sa, y e ora ey despues nan a sinti esun grandi.”

   Varios persona a confirma, cu nan no sa di con diripiente nan a spierta, y tabata lanta ora cu e temblor di 04:14:49 a.m. a socede.

   E temblor tabata asina fuerte sinti na Aruba, cu varios hende a sinti cu nan Car-Alarm a activa.  Esey nifica cu e resonancia, y e sacudimento lo a pone alarmanan aki trip tambe.

   Cachonan a cuminza ladra hopi caminda, y varios habitante a raporta cu nan parhanan pafor di cas a cuminza haci desorden e ora ey.

   “E pushi cu mi tin na cas, a cuminza haci nervioso mes, y nunca antes mi a mire asina,” un ciudadano a relata na DIARIO.

   Dos emisora local a stop cu nan programacion di computer-music, y a bay pa ricibi yamada di pueblo encuanto e sucedido.  Prome Ministro Mike Eman tambe a bay den aire e madruga aki pa splica kico ta pasando.

   Aunke na prome bista, no tabatin informe di ningun daño material, tog ya for di 10’or di mainta algun ciudadano cu a bay revisa nan cas bon a descubri cu tabatin scheur tog den nan muraya.

   Diferente persona di Rooi Koochi a raporta cu nan a bin descubri scheur den muraya di nan cas.  Kizas e area unda nan ta biba, ta consisti di tereno cu ta mas sutil ora di temblor.

   Ta ser bisa cu na parti di Pariba di Brug, posiblemente hende a sinti esaki mas fuerte.  Pero hecho ta cu ta mustra cu ta tur caminda a sintie mes hopi, tur ta depende di e tipo di tereno riba cual bo cas ta construi riba dje, e.o. con solido e tera ta.

   Ora mainta a habri, esnan cu no a sinti nada, a bin haya sorpresa cu un temblor a fungi como Wekker pa henter e isla, cu excepcion di nan.

- Advertisement -

DUNA COMENTARIO

Please enter your comment!
Please enter your name here