Home Editorial UN AñA NOBO

UN AñA NOBO

2
0
SHARE
- Advertisement -

jossy_mansur_pic                Nos ta na comienzo di un aña nobo, cu cambionan radical riba diferente tereno, especialmente esun politico. Hulanda no tin fin di cuminza cu su investigacion, y ta parce di kier laga tempo pasa pa hendenan lubida riba dje. Cerca nos na DIARIO e flie ey no ta subi, pasobra e desastrenen cu e hendenan ey a causa mester tin consecuencianan pa nan. Bo no por ta dilanti di tanto evidencia di corupcion, nepotismo, patronahe y persecucion político pa djey opta pa cruza braza y mira den otro direccion.
 
                Ta na nomber di kico nos mester pasa pa olvido tur e misionnan di destruccion cu nan a lanza for di e puestonan di poder contra esnan cu no ta comparti nan posturanan egoista? Cu ki actitud nos mester considera e boycot cu Nel a lanza contra DIARIO, usando tur e recursonan di Gobierno pa purba silencia e voz mas importante di prensa na Aruba? Con nos por acepta e encargo cu nan a duna belasting, por ehemplo, pa persegui inhustamente e contrincantenan di su politica nefasto? Tin di esnan cu for di puestonan di poder ta predica, pa nan comodidad y excusa, cu e resistencia di otronan contra nan politicanan sectario ta un atentado contra Aruba, comosifuera nan accionnan beneficario exclusivamente pa nan grupito di privilegiadonan, tabata conta cu e absolucion di nan ignorancia! Esey no ta nada otro cu un apologia di e vileza cu a pretende durante e ultimo 8 añanan di ta propietario di e reglanan di conducta general, amen di cualke Ley!
 
               Esey tabata for di Gobierno! Awor ta for di oposicion nan ta demostrando un inadaptabilidad na e clima di paz y progreso cu e ganador categorico di eleccion ta propagando den tur skina di Aruba. E contesta di Pueblo na tal actitud ta bay ta negativo! Pakico? Pasobra su memoria no ta cortico y e ultrahenan ta demasiado reciente! No ta e momento adecuado pa bay den un repeticion di tur e desastrenan cometi, apesar di e repugnancia cu nan impunidad a causa.  Mi ta rememorando lo indispensable, no pa prolonga e tema, sino pa e sirbi como algo utilizable den e proceso di prevencion cu ta cuminza cu e aña nobo cu a caba di habri.
 
             Nos mester enfoca nos atencion awor riba e problemanan cu tin mester di un solucion urgente. E trecemento back di KLM y posiblemente otronan, no ta suficiente riba nan mes. Nan ta un bon comienzo den e sentido cu nan ta enfatiza e labornan positivo y exitoso cu e Gobierno nobo ta ehecutando. Nan ta demostra ademas, cu e Conseho di Ministronan nobo no ta un simple rotacion di ministeriablenan, sino e definicon di un rumbo diferente na esun cu a hiba nos te na e rand di un abismo. Cada un di e Ministronan recien nombra, pesey mes, tin e tarea duro di crea orden unda caos a impera durante tanto tempo.
 
                Lo mas importante actualmente ta pa haci nos kere den e regeneracion di Aruba; den e derota permanente di cesarismonan infimo pero cu consecuencianan grandi; den un futuro den cual nos tur por participa cu e mesun idealnan di paz y progreso, comprension y tolerancia; den un isla cu ta pertenece na nos tur, sin distincion di raza o rango, y for di riba cual nos por destera hamber y miseria; y finalmente den un Gobierno cu por honra tur e anteriornan sin titubeo.
            
              Pa finaliza, permiti desea henter e Pueblo di Aruba un aña 2010 yen di salud, felicidad y prosperidad, den e orden ey. Cu Dios drama su bendicion riba tur hogar existente na Aruba, y plame riba cada un di e habitantenan di cada cas. Ban mira futuro hunto cu optimismo, y ban haci loke cada un di nos mester haci como deber y obligacion, pa tene e nomber di nos isla na halto tur ora.

- Advertisement -

DUNA COMENTARIO

Please enter your comment!
Please enter your name here