Home General Yamada Pa Grupo Cu A Haya E Prome Vacuna Tuma E Di...

Yamada Pa Grupo Cu A Haya E Prome Vacuna Tuma E Di Dos Dosis

1
0
SHARE
- Advertisement -

Sra. Maribel Tromp, di Salubridad Publico:

“ E vacuna ta safe y recomendable” 

ORANJESTAD (AAN) — Señora Maribel Tromp, di Departamento di Salubridad Publico, Seccion Epidemiologia, a hiba palabra ayera den conferencia di prensa, tocante e di dos ronda di vacunacion contra AN1H1.

E dama a referi na e situacion actual di Swine Flu na Aruba, y el a bisa cu en principio nan ta registrando solamente casonan severo y no leve. Pero te cu aworaki nan no a haya notificacion di Hospital riba casonan severo e ultimo dianan aki.

Salud Publico a cera 2009 cu 64 caso confirma, for di un total di aviso di 855 caso sospechoso. Nan ta sigui monitor ya cu tur caso cu ta worde manda Laboratorio, nan ta worde notifica di nan, y pesey nan ta keda registra.

Actualmente, den nos pais e griep ta manifestando su mes tog, cu casonan di modera pa severo pero mas caso di personanan saludable cu ta sintie como un griep pisa, pero gewoon.

Den December, cu tabata tin e prome ronda di vacunacion a haya vacuna solamente 5.046 persona den e grupo di riesgo, locual ta 35% so di e totalidad di personanan di riesgo na Aruba, locual ta un average di 14 mil pa 15 mil habitante.

“ Pesey nos kier a haci un yamada na esnan cu ta cay den grupo di riesgo, y no a ricibi e prome vacuna ainda pa haci esaki un biaha mas, cerca nan docter di cas”, sra. Tromp a señala. (Minister Visser a amplia riba esaki).

El a sigui splica cu si compara esaki cu Hulanda den e prome ronda, aya tabata 72% pues Aruba no ta ni mitad di locual eigenlijk lo tabata ideal den un campaña di vacunacion, y locual esaki ta bisa ta cu nos habitantenan ta coriendo un riesgo halto, y cu si nan ta haya e Swine Flu nan por bira hopi malo, y cu consecuencianan, manera a sosode aña pasa cu e ocho casonan cu tabata tin.

Pesey sra. Tromp a haci un yamada na tur e personanan cu ta cay den e grupo di riesgo cu a vacuna caba, pa por fabor, acudi na e di dos etapa, y pa esnan cu no a ricibi e ainda, pa tuma contacto cu e docter di cas.

Encuanto e posible complicacionnan cu por a surgi door di e vacuna, Departamento di Salubridad no a haya ningun melding, ni cerca mucha chikito, ni personanan riba 60 aña.

E personanan no a experiencia un keintura halto fuerte, algun a haya un tiki temperatura y mas tanto localmente unda nan a worde vacuna, cu a bira un poco cora, doloroso of a hincha un tiki.

Cu otro palabra, esaki ta indica cu e vacuna aki ta safe y e ta recomendable, pa tur hende bin tume.

- Advertisement -

DUNA COMENTARIO

Please enter your comment!
Please enter your name here