‘Joran por bin entiero’
ORANJESTAD(AAN): Den corant Hulandes De Telegraaf a sali un articulo tocante entiero di Paul van der Sloot den cual tin para cu “e fugitivo” Joran van der Sloot lo no mester tin miedo cu e lo wordo deteni na Aruba, ora cu e bin tuma despedida di su tata. Te asina leu cu DIARIO ta na altura di dje, Joran actualmente no ta wordo considera un fugitivo. El a wordo acusa di tin di haber cu desaparicion y/of morto di Natalee Holloway, pero te ainda e no a wordo haya culpable pa esaki, apesar cu un grabacion scondi a mustra con Joran a admiti di a benta curpa di e hoben Mericano afo.
Pues na e momentonan aki e no ta wordo busca pa husticia. E articulo ta sigui bisa cu segun Fiscal Mayor Peter Blanken, “un detencion no ta apropia den un situacion asina”(entiero) y ademas e investigacion no ta duna motibo pa detene ora e yega Aruba”.
Paul van der Sloot te cu final di 2005 a wordo considera un sospechoso den caso di desaparicion di Natalee Holloway, pero na November 2007 un huez a dicidi cu e lo no wordo persigui.
Pa loke ta persecusion di Joran, O.M no a tuma un decision ainda, segun e articulo.
“Si Joran lo mester presenta dilanti di huez ainda, nos lo dicidi mas laat den e aña aki”, segun e fiscal mayor. “Ta un caso complica, pasobra nunca un curpa a wordo haya”.
