“Panico” ora un Pitbull a drenta Supermercado
Doño chines, cu clientenan, y hasta cahera a dek
ORANJESTAD (AAN): Relaciona cu desde siman pasa a cuminsa promove asina yama “Standup Comedy” presenta pa Pachi Damoen y Elden Booi, durante su presentacion e palabra ‘Panico’ a worde menciona.. Y na varios ocacion el a trece dilanti comparacion- y nificacionnan. Wel na Aruba tambe recientemente un cacho di raza Pitt bull a percura pa “Panico”. Dialuna mainta trempan pa ser exacto 9’or, Central di Polis ta dirigi patruya Oranjestad cu urgencia na un supermercado situa na Primavera. A resulta cu un cacho di raza “Pittbull” a cana drenta den e supermercado y e presencia di e Pitt bull a crea “Panico”. E cacho a drenta pareu cu un persona kende a bay cumpra corant, y ora e persona a sali, e cacho a keda paden.
Esnan presente e momento ey, tanto e doño Chines, cahera, cliente y lo demas a busca pa dek unda nan ta sinti cu no tin peliger. Loke a spanta nan mas, ta cu e cacho tabata cana pariba-pabao mey-mey di e shelfnan, y tabata mustra nervioso.
Mientras tanto, un di e doñonan di Supermercado a habri un bleki di cuminda pa e cacho, y cu esaki a trata na ‘lok’ e animal pa e bay pafo. E persona a logra di saca e cacho, door di mustre y dune e cuminda. E cacho e ora a keda eyfo dilanti e Supermercado, y e hendenan spanta paden sin cu nan por sali.
Polisnan cu a presenta a constata cu e Pitt bull ta pafor di e supermercado, y cu tur hende ainda ta paden den “Panico”. Un rato despues, e doño di e Pit bull a presenta, y asina caranan a cambia y nan a sinti un alivio.
Segun e doño di Pit bull, accidentalmente su cacho a sali for di cura, normalmente e ta sera den su hoki. Ora cu Pittbull a bandona e supermercado esnan presente por a hala rosea y sigui haci nan deligencia. Apesar cu e presencia di Pittbull den e supermercado inespera a worde basta comenta.
Un cliente kende tabata den e Supermercado, a splica DIARIO cu bon mes cu e doño di e negoshi a logra di habri e bleki di cuminda, y asina logra saca e cacho, pasobra maske algun hende despues a bisa cu e cacho ta ‘manso’, e clientenan si a mira cu paden e tabata hopi nervioso cu su canamento den e gang.
DIARIO a ricibi un suplica di un cliente, kende a pidi pa e doñonan di Pit bull haci mas esfuerzo pa tene nan animalnan den cura, pa busca forma pa garantiza cu nan lo no bay sali riba caya.
Segun un rapport publica na Merca na April 2009, un Pit bull ta mata un hende cada 21 dia.
E version di e pitbull cu vocero policial a revela, mesora a bay varios aña nan atras. E tempo ey famia Marchena den Emmastraat tabata tin un cacho raza. E cacho aki tabata asina inteligente y bon entrena, e tabata bay haci respondi. Cu su dientenan e ta tene un mandje cu ta contene placa y cana bay tur mainta na Panaderia Moderna.
Aya nan ta saca suma placa for di e mandje y ta pone e pannan aden. Despues riba e mesun ruta e Dobberman ta regresa cas y entrega e mandje cu contenido. Asina e dobberman tabata cumpli sagradamente cu su obligacion increhibel pero berdad entre otro rumannan Wiwi y Harold Marchena por confirma e version aki.
