240 ora di trabao comunitario, pa ladronicia y maltrato
ORANJESTAD (AAN): Diahuebs na corte a tuma lugar un caso den cual Rachyt J.A.L a worde acusa di conhuntamente cu un otro of otronan, ladronicia di motorcycle di un persona y/of di Polis y/of di Pais Aruba riba 10 di Juni 2006. Tambe e ta worde acusa di ladronicia den un auto di propiedadnan di un persona y/of di ladronicia den un otro auto di propiedad di otro persona riba 8 di Juli 2007. L. a worde acusa ademas di tabatin un patronchi den su pertenencia riba 6 di Februari 2008, sin cu e tabatin permiso pa esaki.
Alavez el a worde acusa di, cu e intencion di causa daño fisico pisa na un persona, a, na un forma intencionalmente violento bay cu su auto riba e persona aki y/of dal e cu auto riba 13 di Januari 2008.
Huez a cuminza na bisa cu e acusado ta ‘first offender’, pues cu nunca antes el a haya su mes den problema cu husticia.
Segun huez, na Mei 2008 Rachyt a worde ofreci durante un asina yama TOM Zitting, pa e haci 200 ora di trabao pa comunidad, pero mirando cu e no a cumpli cu esaki, e caso a bin dilanti di huez.
Pa loke ta e caso di ladronicia di e brommer, ta asina cu bisiñanan di warda di polis na Balashi na dado momento a wak algun mucha homber bula drenta den cura di e warda y uno a start un motocicleta.
Rachy ora cu el a worde deteni pa polis a declara cu el a haya un lift di dos persona cu e no conoce y uno a puntre pa e yuda coi e brommer back, pasobra di dje e brommer tabata.
E persona aki kende ta propietario di e brommer a worde interoga tambe pa polis, pero el a bisa cu na ningun momento el a pidi hende yude pa coi e brommer.
Pa loke ta e caso di hortamento for di algun auto, tin hende cu a wak 3 mucha homber purba drenta auto y despues nan a core bay. Polis a bay nan tras y a logra gara nan.
Un di nan tabata Rachyt, kende a bisa polis cu e sa cu e tabata fout di a participa cu e otronan.
Pa loke ta e patronchi, polis despues di un pelea cerca di cafe Capri a pidi propietario di un toyota blanco esta Rachyt si nan por a listra den e auto y el a duna nan permiso.
Ora cu nan a busca den e auto, nan a haya un bala di pistol. E acusado a declara cu el a haya e bala aki riba vloer durante un parada di carnaval y el a dicidi di pone den asbak di e auto.
Pa loke ta e acusacion cu R. lo a comete intento di homicidio, ta asina cu na dado momento cerca di Calbas el a perde control di su auto y a dal den otro auto. Door cu e no tabata tin rijbewijs riba dje, e kier a core bay for di e sitio.
E sra kende tabata maneha e otro auto a para dilanti di su auto pa e no core bay. Rachyt a indica na polis cu el a rabia y core bay, pero un testigo y e sra tambe a bisa cu ora cu R. a core bay, e auto a dal e sra tambe.
Fiscal a haya tur acusacion comproba y el a bisa cu mirando cu e acusado tabata menor di edad ora cu el a comete e crimennan aki, e lo kier dune un castigo condicional, pa e keda tambe bao di supervision y guia di reclasering.
Fiscal a exigi 120 dia di castigo, kitando e 32 dianan cu el a sinta caba den detencion preventivo.
E 88 dianan cu ta resta, mester colga riba cabez di e acusado como castigo condicional.
Esaki durante un tempo di prueba di 2 aña.
Banda di esaki R. tin cu cumpli cu 240 ora di trabao pa comunidad. Huez a bay di acuerdo cu exigencia di fiscal.
