Abuso sexual di mucha, un inhusticia inmenso

Fundacion Respeta Mi:
ORANJESTAD (AAN): Abuso sexual di mucha ta pasa aki na Aruba y mas cu kizas nos ta pensa.
Ki ora ta papia di abuso sexual di mucha? Ora un persona di mas edad cu e mucha, usa su influencia, su experiencia of su poder pa forza e mucha pa haci of tolera actonan sexual cune.
Ora e abusador ta un hende di confianza, por ehempel un persona cu e mucha ta stima, e mucha na prome instante lo tuma e acercamento como cariño.

Abuso sexual tambe por sosode bao di menaza y violencia. Casi semper e adulto ta menaza of ‘cumpra’ e mucha pa ten’e secreto. Abuso sexual por ta fisico, por ehempel caricia of cualkier forma di mishimento inapropia, penetracion, violacion of intento pa viola y usa mucha pa pornografia.

Abuso sexual por ta no-fisico, por ehempel fotografia indecente, papia abiertamente tocante sex pa shock e mucha of pa lanta su curiosidad y permiti e mucha mira of scucha actonan sexual of material pornografico.

Kende ta abusador? Den mayoria caso e abusador ta un hende homber. Pero sea consciente cu hende muher tambe ta abusa sexualmente di mucha homber y mucha muhe. Abusador ta bin di tur clase laboral, social y etnico. No kere cu solamente un maniaco ta comete abuso.

Un gran parti di e abuso ta sosode door di hende den famia (incesto), por ehempel tata, padraso, welo, primo, ruman, pero tambe door di personan di confianza pafo di famia manera maestro, pastor, lider di club, deporte etc.

Kende ta victima? Victima por ta baby, mucha chikito, mucha grandi, sea mucha homber of mucha muhe. A resulta cu ni edad, ni apariencia ta importa.

Ki daño abuso sexual di mucha por ocasiona? E consecuencianan di abuso sexual por ta grave y pa bida largo. Mas grave ta e perdida grandi di confianza den e hendenan mas yega y e menaza pa keda keto tocante algo asina doloroso.

E daño por ta fisico y e victima por keha di dolornan fisico. E daño mas grandi ta emocional. E dañonan aki por sali tempran, pero tambe na un edad mas halto, despues di a ‘lubida’ e abuso pa hopi aña caba.

Kico mester haci den caso di abuso sexual? Na prome lugar mester percura pa e abuso STOP mas lihe posibel. Ya cu hopi biaha e mucha no por actua pasobra e ta depende di esun cu ta abusa di dje. P’esey ta responsabilidad di tur adulto cu sa di un caso asina, pa actua.

Con pa preveni abuso sexual di mucha? E prome paso ta acepta cu e ta sosode, tambe rond di bo. Como mayor of educador keda habri pa loke ta pasa cu e mucha cerca di bo. Stimul’e pa ta habri cu bo riba tur topico y mustr’e cu bo ta tum’e na serio.

Ta hopi importante pa siña e mucha for di chikito cu e tin e derecho pa dicidi riba su curpa, ken por mishi cune si of no. E mester conta secreto cu ta dun’e miedo y ta haci’e daño. Por ehempel un secreto cu ta dune hopi dolor di barica of ta lag’e sinti agita. Pa preveni abuso ta hopi importante pa: No laga bo yiu su so, sin supervision. Semper sa unda bo yiu ta y cu ken.

Confia riba sentimento di bo yiu ora e no kier haci algo, por ehempel sinta riba scochi di su welo, omo etc. Tambe ora bo yiu no kier duna sunchi y brasa na famia y otro hende of ora bo yiu no kier pasa anochi cu famia of conocir.

Papia cu un hende cu bo ta confia ora bo ta sospecha abuso. Busca ayudo! Instancia cu ta yuda bin cu investigacion: Bureau Sostenemi (tel. 588-1010), Jeugd- en Zedenpolitie (tel. 585-2500), Directie Voogdijraad: (tel. 582-1262). Instancia cu ta ofrece ayudo/guia na e mucha y su famia: Dept. di Asunto Social: Trahador Social den Distrito, Dept. di Asunto Social:

Seccion Dificultad di Bida y Famia (tel. 582-3145). Tambe por acerca: dokter di Wit Gele Kruis den distrito, dokter di cas, trahador social na school. Pero ta keda na esun cu e mucha ta confia, pa tuma e prome paso.

Sosten di comunidad! Pa straño cu e por zona, sin embargo nos comunidad no tur ora ta sostene e victima di abuso sexual. Nos tin e tendencia di no tuma palabra di mucha na serio, lubidando con dificil ta pa un mucha bin cu keho di hende cu e ta stima y confia. Mucha a siña cu semper adultonan tin razon. Bao presion di un adulto masha lihe un mucha lo cambia of laga su declaracion cay.

Experiencia a mustra cu mucha no sa gaña tocante sucesonan asina! Si no confronta un mucha cu sexualidad di adulto, con e ta yega na conta algo asina? Mas lihe nos ta kere e adulto, acusa di abuso, cu ta desmenti y declara cu e mucha a bin cu fantasia.

Hasta e famia mes, den hopi caso no ta kere e mucha. Ta hopi dificil pa acepta cu ta bo casa, compañero, yiu of ruman a haci algo asina. Y kico lo pasa si e bay cera? Ta mas facil pa kere cu bo yiu ta gaña. Y asina nos ta laga e victima na caya atrobe. Semper tuma mucha na serio!

Un comunidad cu ta siña respeta otro, respeta hende muhe y mucha y cu tambe ta siña cu no por satisface necesidadnan a costo di mucha, ta contribui na yuda preveni abuso sexual di mucha. Preveni ta miho cu lamenta, pasobra un mucha abusa ta un bida deforma.