Home Editorial Actividadnan Y Logronan Di Gobierno Den Ascenso!

Actividadnan Y Logronan Di Gobierno Den Ascenso!

2
0
SHARE
- Advertisement -

jossy_mansur_pic                Despues di un comienzo di bastante “show”, e mandatarionan di AVP a dicidi di pone e camaranan un banda, a hala manga di camisa y a bay na e encuentro di e solucionnan cu Aruba tin mester pa mantene e consenso di positivismo cu a gana tereno na e mesun momento cu e partido a gana eleccion. Unda cu bo drey bo ta topa cu hendenan impresiona pa e cambio cu a tuma lugar, y cu ta expresa nan satisfaccion pa e prome logronan di AVP den Gobierno.

 

              Tin un ambiente contagioso di bienestar cu a invadi e cayanan di Aruba, palpable tur caminda. No ta cuestion di expresa faboritismo pa un partido determina, sino pa enfoca e tareanan cumpli te awor y cu a produci den apenas un par di luna e regreso di KLM, e retorno di Carnival Cruise Lines, e reapertura di un hotel, e areglo cu Ritz Carlton cu ta evita e pago innecesario di mas di 100 miyon di dolar si no a cumpli cu e acuerdonan precipita cu e gobierno anterior a haci pa compromete y perhudica tanto e Gobierno nobo como e isla mes, e renovacion di e centro di Playa cu ya a cuminza y un sinfin di otro proyectonan den vispera di ehecucion. Bo ta observa caba un resureccion notable den turismo, danki na e bon trabao di Otmar, y e posibilidadnan di e reapertura di e refineria ta tumando formanan concreto cu cada siman cu pasa.

                  Banda di tur e logronan aki bo ta scucha tambe algun keho di AVPistanan cu e partido no ta yudando su hendenan, y bo ta haya tambe esnan cu ta haci expresionnan di decepcionnan legitimo cu nan no ta hayando e apoyo solicita for di nan Gobierno. E realidad ta cu mayoria di hende, especialmente esnan sin trabao, no ta sinti cu nan problemanan personal ta ser atendi cu e debido diligencia, ya cu hopi di nan ta aspirando un trabao den Gobierno. Pero, e tempo cu a transcuri te awor pa atende e tipo di casonan ey ta hopi cortico, y e mercado di asimilacion a ser copa por completo pa e delincuentenan di MEP cu a hisa pone sin ningun consideracion pa e situacion financiero precario di Gobierno.

                   Nan interes no tabata pa yuda esnan sin trabao, sino pa cumpra nan votonan forzando nan den un aparato publico completamente satura. E iresponsabilidad cu cual el a ser haci ta papia di locura, no sensatez. Si bo no tin placa pa paga mas hende den Gobierno, di kico bal pusha nan eyden prome cu e situacion ey ser solventa? Mi sa cu ta dificil pa esnan den necesidad tene pasenshi, y mi ta sigur cu e mandatarionan ta compronde e urgencia di nan problemanan pa un solucion, pero asina mes ta bon pa splica cu tin cosnan inmediatamente factible, otronan cu por bira factible cu tempo, y algun pa cual factibilidad simplemente no ta existi.

                   E berdadero responsable pa e situacion di crisis financiero cu ta existi den Gobierno a desaparece for di e panorama político y por ta di e partido tambe. Despues di a malgasta ocho aña den complacencia y enrikecimento di su ayegadonan, na lugar di enfrenta e situacion y bati un mea culpa riba su pecho, ate ausente y incapaz pa duna un man den Parlamento pa coregi tur e anarkianan cu e mes a crea y awor a laga pa otronan elimina. Si el a sigui den Gobierno, e bientonan cu el a sembra lo a bira e tempestadnan den cual Aruba lo a naufraga sin e posibilidad di rescate. Pero, politica tambe tin su botica di remedinan pa e malnan cu ta azote, y un Pueblo hopi consciente di e situacionnan di gravedad cu el a fomenta cu su tolerancia di tanto corupcion, a dune un boleto di partida y un bon skop di despedida.

                   Awor Aruba ta den man di un ekipo nobo, dispuesto di traha sin descanso pa debolbe nos isla e progreso for di cual el a ser despoha pa e avenan di rapiña di MEP cu a plunder su rikezanan publico. E consigna ta ‘e mayor bon pa e mayor cantidad di hende.’ Esey ta e cabay di bataya y e filosofia político cu Gobierno ta imponiendo pa bari for di mesa e antiguo faboritismo extendi solamente na un grupito di amigo y famianan, mihor conoci como “friends and family”. AVP ta den e proceso di restaura loke MEP a haci su best pa dera, o sea un Aruba cu e representantenan di e partido geel den e gobierno anterior a carga cu e peso agobiante di nan vicionan. Pero, ya e show a caba hunto cu e abusonan anterior, y e trabao duro di recuperacion a cuminza duna su frutanan.

- Advertisement -

DUNA COMENTARIO

Please enter your comment!
Please enter your name here