Acuerdo firma entre Gobierno y Valero ta amplia posibilidad di solucion pa e refineria
Noticia di ultimo ora duna pa Prome Minister:
ORANJESTAD (AAN) — Prome Minister mr. Mike Eman, a anuncia ayera’tardi cu gobierno a firma un acuerdo cu Refineria Valero pero esaki no ta nifica cu a keda garantiza cu a yega na un solucion permanente pa e refineria. Pero si ta asina cu e acuerdo aki ta ensancha e posibilidadnan pa gobierno yega na un acuerdo duradero pa e funcionamento di e empresa. Minister Presidente a subraya cu for di e prome lunanan den gobernacion, su gabinete a sinti cu un di e problemanan cu tin pa yega na un re-apertura di e refineria ta aspectonan internacional economico, cu ta worde fiha pa e prijs di petroleo den e mercado internacional, y cu dificilmente Aruba por tin influencia riba dje.
Pero tin aspectonan domestico cu tambe tabata motibo di bastante conflicto entre gobierno anterior y Valero, y riba esey Gabinete nobo a traha duro riba dje, pa elimina nan, y a yega na un “memorandum of understanding” na Januari ultimo, unda a logra acuerdonan global, y durante e ultimo simannan aki gobierno a traha oranan largo pa logra un “settlement agreement” den cual, na un forma mas specifico cu ta agrega tur e aspectonan acorda den e memorandum.
Awor a yega na un acuerdo nobo cu Valero cu e compania y gobierno nobo ta contento cune, den cual a kita tur e disputanan cu tabata tin den pasado.
Den e memorandum nan a papia di un suma di 200 miyon Florin cu Aruba lo paga Aruba, pero den e siman aki a logra un suma di 210 miyon, suma cu gobierno lo por uza y mirando cu nan a hereda un presupuesto di 290 Florin pa aña 2010 sin duda e entrada aki lo yuda.
Un minimo a worde fiha di 7% impuesto riba ganashi, y esaki ta nifica cu si e refineria gana of perde, e compania ta bay paga tur aña diez miyon Dollar, sea Valero mes, cu gobierno lo sigui lucha pa e keda, of un refineria nobo, ya cu tin interesadonan potencial pa tume over.
Prome Minister a subraya cu en todo caso, den e proximo periodo aki e minimo cu lo worde paga ta 15 miyon Dollar, y hunto cu esaki tambe tin un impuesto cu anteriormente no tabata worde cobra di tax holiday, di 1.2 miyon Florin cu Valero lo paga anualmente.
E dignatario a subraya cu mirando e incertidumbre cu tabata tin cu a obstaculiza e negociacion cu Valero, cu ta e asunto di VWO riba exportacion, den e acuerdo aki a worde elimina, tanto pa Valero como pa tur e companianan di exportacion. Esaki ta trece un claridad importante, e mandatario a subraya.
Prome Minister a gradici gerencia di Valero na Aruba y di Merca y Minister di Finanza y Energia, pa tur e ambiente aki y e trabao cu nan a haci te laat anochi, y ademas e conseheronan legal y fiscal, departamento di Impuesto y Douane.
E dignatario a remarca cu asina aki a habri mas e oportunidad di por yega na un solucion duradero, pero tog el a subraya cu gobierno no kier lanta expectativa, mirando cu e entrada di hopi hende ta pendiente di esaki. Aunke si ta asina cu e acuerdo aki ta haci e chens mas grandi pa yega na un solucion positivo, pero ainda no a yega na esaki cu ta un reapertura di e refineria.
Prome Minister a expresa cu tin cumpradornan potencia, y partnernan potencial, y tambe clientenan, pero ainda tin nada concreto cu por bisa cu nan a yega unda kier yega, y gobierno hunto cu Valero tin compromiso pa yega na esey, di manera cu e trabaonan duro ta sigui!
