Home Cultura Analisis di Caranaval 2010 (3)

Analisis di Caranaval 2010 (3)

3
0
SHARE
- Advertisement -

juby1Pa: Juby Naar
COSNAN

Hopi tabata e comentarionan cu a ricibi ayera di lectornan di cosnan cu a pasa durante varios di e actividadnan di carnaval, locualnan no ta cosnan di publica ariba. Esaki pasobra nan no tin di haber cu e analisis di e actividadnan y ta sucedidonan fuera di e actividadnan mes.
Ta hopi cos a pasa sigur cu mi ta na altura di nan, pero no ta cosnan cu ta comenta riba nan y trece discordia por nada. Otro aña nan lo sosode atrobe y ta tur aña ta sosode.

PROMO
Ayera a termina na promocion di e actividadnan musical. Pero promocion di e gruponan tambe mester wordo haci. Durante parada tin un of dos grupo cu ta duna papel cu informacion di nan piezanan y nan grupo na hurado. Pero mayoria di esaki mester tabata conoci caba pa e publico por sa kico nan lo ta mirando.

E publico ta haya sa toch di e disfraz si e ta wordo usa pa Lighting Parade y Parada di luz caba. Ta e piesanan so ta keda atras. Mayoria di radio y television no ta duna descripcion di e piezanan aki ni carosa ora nan ta pasa. Nan ta papia di loke nan ta mira, pero e significacion y e pakiconan di e carosa of roadpiece no ta bira conoci.

PUSHADOR
Den e reglamentonan ta para encuanto pushadornan di roadpiece of carosa (si e roadpiece wordo considera un carosa di parti hurado, debi na su grandura etc) cu nan mester ta disfraza (di e tema) . E aña aki masha poco tabata tin pushadornan difraza di e tema. Tabata tin bisti con cu ta cu nada carnavalesco. Si e hurado a basa riba e punto aki mayoria di roadpiece lo a keda for di puntuacion necesario.

BODYPIECE
Masha poco bodypiece tabata tin den parada y e reglamento riba esaki ta bisa entre otro cu e mester por representa su creacion/tema claramento,. Por tin nomber di e creacion/tema riba dje. (e no ta un mester). Ta Medusa di Majestic tabata tin esaki claramente.

SECCION
Den reglamento pa seccion tabata menciona cu e seccion mester ta di no menos cu 6 carnavalista. Hopi grupo tabata tin seccion di 4 minimo. Ademas di esey e reglamento ta menciona cu e seccion mester por representa e tema claramente y cu creatividad ta un plus punt. Esakinan no por a mira cerca hopi di e seccionnan di gruponan. Ni ora cu nan ta di 10 of mas persona. E tema ta importante pa represente.

CAROSA
Den carosa tambe tin e reglamento di cu e mester representa e tema. Tabata tin carosa caminda bo tin cu busca cu verrekijker unda e tema di e grupo ta representa den e carosa. A bira cu ta djis pone cierto decoracionnan y duna e carosa un nomber y ta usa e decoracionnan poni riba dje como representacion di e tema.
Tur esakinan ta cosnan cu gruponan mester tene cuenta cune.

KING AND

QUEEN OF

BANDS

Mi a yega di splica esaki na varios ocasion den pasado y te ainda parce cu no tin hende cu sa kico esaki ta y di con e ta den carnaval.

Tempo cu Aruba a cuminza cu carnaval, e prome añanan tabata escoge e King and Queen of Bands for di e figuranan di importancia di e grupo. E gruponan tabata tin un figura femenino y un figura masculino dilanti como nan figuranan principal. For di e figuranan principal aki tabata eligi e King and Queen of Bands.

Na Trinidad tabata tene un eleccion di King and Queen riba caya tambe, despues a bini e eleccion special di figuranan principal di gruponan y durante e eleccion aki ta eligi e King and Queen.
Na Aruba e gruponan a stop di presenta un figura masculino y femenino como figuranan principal di e grupo y e tema, y a cuminza eligi nan for di entre tur e gruponan riba caya.

Figura principal di un grupo como King y di otro grupo como Queen, si e grupo no tin e dos figuranan sobresaliente hunto.

Awendia ta escogiendo un king and queen of bands for di TUR participante di carnaval den e parada.. E mester ta impacta enorme den e grupo y den e parada. E por ta un figura cu su bodypiece ta complementa hunto su roadpiece si e ta cu un roadpiece. E por ta cu su bodypiece individual na pia of riba carosa unda e ta sobresali. E mester ta biba cu e creacion y goza di e parada den su totalidad. E mester ta spectacular ora bo mire y MESTER a participa tanto na Playa como na San Nicolas.

GRUPO DI AÑA
Tambe ta ser puntra riba grupo di aña. E grupo aki tambe mester a participa den tur dos parada grandi y mester ta impresionante, impactante, bunita y bon acaba. E participantenan mester ta sinti nan mes resplandece tur momento. E grupo mester a participa tambe cu un reina den un di e eleccionnan di Reina di Carnaval.

TEMA DI GRUPO
Por a ripara cu mi ta ripiti tema na varios ocasion. Tur grupo anualmente ta ser sugeri di parti SAC pa manda nan tema y splicacion di antemano pa SAC pa asina e hurado por evalua cada pieza y e grupo. Loke ta pasa ta cu e grupo NO TA HACI esey. Tin grupo cu durante parada ta presenta un papel cu splicacion. COASTAL y TEXACO, tambe CHAMPAGNE y TOB den pasado tabata manda un documentacion cu henter e parada su secuencia, schetsnan di e roadpiece nan y carosa y di e bodypiecenan , di e masa y seccionnan. Tur cu nan splicacion. Tin varios aña cu bo no ta haya esaki mes y nan no ta cumpli cu e peticion di SAC.

MUSICA  PA SHOW
Tambe por a tende e aña aki cu no tabata tin show di gruponan. Pero si nota bon, no tabata tin musica pa por tin un show di e participantenan.
Show por tabata tin riba “Pele” di Le Groove, pero no ta algo cu a practica pa parada. Por a haya un show bunita si e cancion “Wave runner slide” di Giovani Trimm tabata mas popular.

E cancion aki si por a ser usa pa bunita show riba caya di e gruponan. Por corda cancionnan di show manera “The Truck”, “Mexican Swing”, “Jum-B”, “Hurricane” entre otro cu e gruo tabata duna shownan bunita. Esaki parce a caba tambe den e variacion di ritmonan cu tin awor pa escoge Roadmarch

POCO  GRUPO
Ta ser menciona di poco grupo di carnaval y cu antes tabata tin mas grupo. Esaki ta berdad. Pero mester considera cu antes tabata tin laga mi djis menciona 20 grupo y awe tin 10. Esaki pasobra antes tabata tin 20 grupo di 80 pa 100 hende y 200 como grupo mas grandi.

Awe ta haya 10 grupo di cualnan 6 sigur ta di 300 pa 500 hende pasobra hendenan di e gruponan di 80 pa 100 a uni den e gruponan cu awe ta grandi. Nos por a tende di grupo grandi na Corsow y ora tende cifra ta ripara cu ta di 200 hende pero ta yen di grupo di 200 of menos tin tambe cu ta aparenta mas grupo.

Antes cada grupo tabata tin un steelband, un brasssband, un soundsystem of un banda pa grupo.
Awe un grupo grandi no por balia un brassband, ni un steelband (normal di antes cu 20 pa 40 persona,) ni un soundsystem, ni un banda normal sin e cantidad di speakernan. Esaki pa motibo cu e gruponan a bira mucho grandi.

MUSICA
Si ripara bon, mayoria di banda cu tin riba nos isla no ta den parada. Ademas di esey mi ta bisa cu tin hopi hende cu kier bin cu grupo di 100 pa 150 hende, pero e prijs cu ta ser pidi pa banda, pa e toca nan di parada no por wordo paga cu grupo di 100 pa 150 persona (y riba dje sin por haya sponsor ). Bandanan a bira caro pasobra nan mester huur equipo special di sonido pa complace e masa di 300 pa 500 hende. Los Laga Bai mes ta draai riba no mas cu 450 persona pa e banda por wordo scucha di dilanti te patras di e grupo.

Volumen di bandanan a bai halto pasobra nan mester wordo scucha pa henter e grupo, y si ta grupo cu algun roadpiece y carosa y varios seccion, e distancia di bailador pa truck di musica ta bira mucho leu y manera por a ripara e ultimo añanan , nan tin cu usa tambe un sistema di sonido di “relay” pa e musica yega, y aki tambe tin gastonan special y riba dje mas gasto di speakernan cu mester huur.

PREFERENCIA
Kico mi lo prefera anto ? Mi lo prefera di mira gruponan te na un maximo di 200 hende. Nos lo haya asina mas grupo y mas variacion di disfraz den parada variedad grandi di tema. Nos lo haya cada grupo cu un banda musical cu e grupo por paga sin cu mester bay huur equipo special di sonido pa cubri henter e grupo. Nos por huur un Soundsystem, esta un Miniteca cu suficiente equipo di sonido pa saca e mes sonido di banda locual lo sali mas barata y henter e grupo por goza di dje mescos.

Esaki lo trece cune e mes cantidad di roadpiece y carosa cu tin actualmente. Solamente reparti den tur e gruponan. E ta keda e mes 20 of mas grupo di antes cu hende ta papia di dje, tempo cu e gruponan tabata entre 50 y 120 hende pa grupo y un parada di carnaval mes precioso.
Esaki ta e direccion cu mi ta mira cu lo mester cuminza tuma, si e situacion financiero no drecha pa participantenan den añanan nos dilanti.

MUCHANAN
Si mira bon, aña pa aña e participacion di gruponan di mucha ta birando menos. Lo por tin mes cantidad di grupo e aña aki cu aña pasa, pero e cantidad di participante ta menos. Muchanan cu ta nos participantenan adulto mañan ta kedando for di paradanan di carnaval.
Mayornan no por paga e sumanan extravagante mas. Cu dolor por manda un yiu, corda si bo tin dos of tres yiu cu kier bay den paradanan.

Patrocinadornan no ta corda riba muchanan mas. Si bo grupo no tin un nomber, bo no ta haya sponsor bo tras.
Parada di mucha na noord mes a cay drastico y esaki tabata un di e paradanan mas placentero y ainda ta asina. Pero si sigui manera e aña aki historia di parada di Noord ta wordo kibra pasobra lo por yega na anuncia su fin un dia.

Colaboracion musical tambe ta laga di desea pa e gruponan aki.
Scolnan no ta participa mas den paradanan, ni na San Nicolas ni na Playa. Nan no por cu e gastonan mas y no tin sosten ningun caminda pa nan.

ELECCION
Si mira bon, hasta nos eleccionnan di reina a cuminza mustra un caida pa falta di candidatanan. Pero e placer mas grandi di eleccionnan, esta e eleccionnan den clubnan y barionan tambe a bay perdi. Awe ta escoge mucha muher pa ta reina, mientras cu antes nan tabata wordo eligi pa por ta riba escenario den stadion of Entertainment Center. E fiestanan special pa esaki tambe a caba y hunto cu esaki e fundraising pa e organizacion.

- Advertisement -

DUNA COMENTARIO

Please enter your comment!
Please enter your name here