Home Cultura Analisis di Caranval 2010

Analisis di Caranval 2010

2
0
SHARE
- Advertisement -

juvermor1Pa: Juby Naar
Awe mi ta cuminza cu e columna anual despues di carnaval, cu ta e Analisis di Carnaval.
E aña aki ta cuminza for di patras cuminsando cu e paradanan grandi di carnaval
COSTUUM
Si mira bon, e costuumnan e aña aki ta diferencia casi nada di e costuumnan di ultimo 10 pa 15 aña.
Por cohe costuum di Champagne, di TOB, di Hospijollies, di Sunrise, di Dushi Carnival Group, di OPC y di Pleasers and Teasers, pone tur hunto como un grupo, y ta djis un nomber mester FABRICA y bisa cu esaki ta e TEMA.


Cu esaki mi kiermeen cu cualquier di e gruponan aki por a usa e costuum di otro grupo cu e TEMA cu nan a bin cune.A bira tambe awor cu ta duna e participantenan e tela y un schets di e “intencion” di e “tema” y den parada ta haya 1– miembro di grupo y cada un cu otro estilo of moda di e costuum. No ta mira uniformidad den e trahenan y cada un ta prepara su trahe na su manera.

Parce cu ta e color y loke por pone riba dje pa e “blink” ta suficiente.
TEMA
Si mira bon, TEMA ta laga di desea den paradanan. Si mira e aña aki, TOB a bin cu tema “Celebracion( di nan 10 aña den carnaval)”. Si bo tema ta celebracion, mester presenta celebracion riba caya. Ta celebra husticia” segun un roadpiece. Otro ta celebra Amor y amistad, pero ta amor y amistad di “den e grupo” of djis tira asina ?

Na mi opinion por a pone tambe “”celebracion di arubianismo” , di colegialidad”, di “trabao duro carnavalesco” y tur lo pasa. Usando e palabra “celebracion” ta tapa wowo di tur hende, mientras cu por a tende continuamente di “Celebracion di 10 aña di e grupo”. Esaki tabata falta.

E tema mester a representa “Celebracion di e diez aña di e grupo” manera a aparenta for di comienzo cu promocionnan.
Cu e piezanan tabata un preciosidad ta sigur, cada un di nan.
Loke ta mira den parada mester “conta e storia tras di e tema”.

E carosa di reina di Carnaval cu tabata e “carosa di aña” si a cumpli. Aki por a mira e celebracion por completo y despues nada mas.. Den e parada di mucha, TOB a presenta e CELEBRACION hopi mas y a enfatisa esaki mas.

CHAMPAGNE tabata tin su Indiannan di Caribe. Si e tema ta Indiannan di Caribe, presenta anto diferente tribo di indian di caribe. No dos roadpiece cu algo di indiannan y e resto di e grupo no ta aparenta nada di IndianNAN di Caribe cu un costuum di un aparente tribo. E historia ta locual mi a haya fala di dje.

E 2 roadpiecenan a conta algo di e tema pero mi kier a haya mas pa e storia ta completo. Cu nan roadpiecenan tabata precioso esey ta sigur, y ta hopi tempo y placa a wordo hinca den nan. E roadpiece di “Thunderbirds” tabata un preciosidad pero e no a relata nada di Indiannan di Caribe pa mirones cu enfasis riba e Thunderbirds cu no tabata basa riba e tema di Indiannan di Caribe. E trahenan si a haci un cos especialmente e mescla di colornan cu tabata otro y cu un masa cu di leu bo por aprecia.

HOSPIJOLLIES a presenta netchi cu nan costuum, pero si nan ta presenta “Mascarada” mester a mira un presentacion real di MASQUERADE y un variacion di tur sorto di mascarada. E ora ey mi lo bisa nan a cumpli cu nan tema.

No solamente un bunita costuum colorido y un mascarada pega na headpiece.
DIAMONDS a presenta chiquito atrobe. Un grupo cu ta haciendo esfuerzo pero no ta haya e sosten necesario ainda. Nan a presenta cu 4 roadpiece sin tema preciso pa e grupo. Sinembargo, e roadpiece di Valentine tabata hopi bunita y e roadpiece di Ski Fantasy tambe a cumpli cu su nomber. Cu nana join cu Hospijollies tambe tabata un gesto hopi bunita pa carnaval.

LOS LAGA BAI a presenta su Ole Ole. Esaki mi ta acepta completo pasobra ta trata di un grupo di MASA. Nan tambe a laga cada persona preparanan trahe na nan manera segun e idea di schets. Por a ripara sinembargo e storia tras di e Tema.

Tur hende por a saca afo cu esaki tin di haber cu “corida di toronan” y cu a presenta e trahenan colorido di toreronan. Por a nota e banderin cora, e toro riba diferente trahe y heapiece etc. Pero e storia a wordo bon presenta cu e grupo aki cumpliendo cu nan tema di Masa .

COLEGIO. Mi a gusta e tema di colegio den parada pero di lamenta tabata cu e pober studiantenan no tin placa pa gasta den carnaval pa un grupo grandi y bunita. Nan roadpiece di “Rock and roll” a cay masha bon cu nan celebracion pasobra nan a bay bek pa comienzo di Colegio Arubano (HBS prome cu esey) y a presenta e periodo musical di e tempo aya cu tabata e Rock and Roll .

SUNRISE.. Nan a cumpli cu nan tema di fantasia di e “Pavo Real”. Ta e roadpiece di mascarada cu 5 aña di celebracion, no a cumpli cu e tema di “Peacock”. Por a mira costuumnan cu e plumanan di Pavo Real cual a cumpli tambe cu e tema, pero ta aña tras aña ta mira e plumanan aki den tur sorto di forma usa pa hopi grupo te cu el a manera perde su buniteza.

DUSHI CRVL GROUP Tabata hopi bunita cu nan trahenan y headpiece cu nan a usa e aña mescos cu aña pasa. Pero mi a haya falta di e STORIA tras di e amazonia.

E titulo di “Beauties from the Amazonia” por interpreta como e buniteza di trahe of di e damanan bisti den e grupo . Mas beauty mi no a mira. Mi a haya falta di e STORIA di Amazonia y e BUNITEZA di Amazonia. Ta un roadpiece di un prikichi of lora of wacamaya, manera mi por yame, mi a mira.

E roadpiece aki tabata bunita, y di lamenta ta cu su hala no a cumpli cu e parada, (kibrando for di diasabra) pero el a mustra como un aspecto si di e Amazonia . Mi a falta animalnan di Amazonia of miembronan di e grupo disfraza den trahenan aparentando e diferente sorto di animalnan como e “belleza di Amazonia. E masa so no ta cumpli cu e storia cu mester tin tras di Amazonia. Mi ta ripiti: cada TEMA mester por conta un storia.

MAJESTIC cu su Diosnan di Mitologia tabata hopi bunita y nan piezanan tambe. Pero si e tema ta Diosnan di Mitologia, mester a presenta diferente sorto di Dios y mustra kendenan ta y Dios di kico.

No djis un nomber di FANTASIA cu un roadpiece y carosa (inovativo) bunita.. Ora mi tende Diosnan di mitologia, mi kier mira e diferente Diosnan di Mitologia di kendenan nos a siña na school.

Esaki a falta den e grupo aki. Aki tambe ta manera a skirbi mas ariba cu ta djis pone un nomber y traha un fantasia rond di e nomber y presenta trahenan bunita rond di e “nomber” di fantasia.
OPC DI OREO a presenta cu su tema di “Ban Balia cu …..”.

E grupo aki a presenta su tema y mantene su tema cu su piezanan di e diferente sorto di musica. Nan costuum tambe a presenta piezanan na nan cu tin di haber cu musica y e celebracion di baile. Aki nos a mira un tema cu a cumpli cune, apesar cu a fantasia costuumnan pa e diferente seccionnan pa e parti bunita y luho di e grupo.

Mescos cu varios grupo, a dedica mas na e shoulderpiecenan pa trece e buniteza y hopi di e trahenan bunita (caro) aki ta pas solamente cu e “baile” segun e tema. Esaki por interpreta facil asina siendo cu si mire di otro banda ta pa haci e grupo mas bunita cu mas luho aden.

PLEASERS & T. tin dos aña ta presentando hopi bon y por mira e adelanto den e grupo aki. Si tin cu tira bista riba nan TEMA mi lo bisa cu e no a representa esaki den e parada. E tema skirbi riba e roadpiece dilanti World Tribes.

Si e tema bisami World tribes, e publico kier mira e tribonan di mundo den e historia cu e grupo ta presenta. No un roadpiece cu esaki skirbi y nada mas di e grupo ta representa “tribonan di mundo” pa nan sa cual esakinan ta etc. Cu e trahenan tabata bunita y shoulderpiecenan precioso esey ta sigur, pero e tema no ta elabora.

LOCO LOCO ta e unico cu mi por bisa cu a cumpli cu nan tema por completo. A pesar cu tabata algo comico, e tabata algo cultural di nos historia. “Boda di antaño”. Nan a presenta e boda por completo. Nos a mira e pareha cu ta bay casa.

E pastoor cu ta casa nan; e suegro para un banda; e sirbidornan di bebida y pasaboca; nos a mira sacamento di potret di e boda, tambe nos a mira e baliamento durante e fiesta di e boda. Esaki mi ta bisa ta “elabora e tema” pa e publico mira e tema manera un pelicula y compronde. A bay asina leu cu a mustra e cas, y hasta e burico mara pafo . E burico cu ( lo) a trece e bruid cas riba su lomba.

TEMANAN

Lagami djis presenta un tema pa por haya un idea.
Si ta presenta un tema manera “Figuranan di Comics”, bo por mira Spiderman, Wonder Woman, Bat Man y Robin, Superman y asina mi por sigui menciona. Pero no presenta e tema “Figuranan di Comics”, cu un of dos riba un of dos roadpiece y e seccionnan ta di “indiannan “ of “africanonan den mondi y presenta un carosa precioso cu un replica bunita di Capiya di alto Vista.

E indiannan no ta figuranan di comics y e capiya tampoco ta pas. E indiannan ta pas si bo usa esakinan cu por ehemplo e figura di comics “Lone Ranger y Tonto” y e africanonan den selva cu e figura “Tarzan”.

Bo no ta presenta e indiannan y e africanonan di selva cu Shoulderpiecenan y bodypiecenan luhoso si nan no ta wordo presenta como figuranan importante di e tribonan y corda menciona esaki tambe riba e pieza of costuum pa e publico compronde pakico nan tey.

- Advertisement -

DUNA COMENTARIO

Please enter your comment!
Please enter your name here