Home Cultura Analisis di Carnaval 2010 (2)

Analisis di Carnaval 2010 (2)

1
0
SHARE
- Advertisement -

juvermor7Pa: Juby Naar
AYERA
E prome parti di “Analisis” ayera aparentemente a cay bon cerca hopi hende cu a yama y manda nan mensahe via celular pa mi. No por keda sin menciona cu tabata tin 2 di nan cu tabata rabia considerando cu mi a kibra nan grupo cu e comentario “negativo”, segun nan … “Sorry! Mala suerte!!”
MOMO

Carnaval a cera cu e dos paradanan di Momito y Momo.
Dialuna anochi Momito na San Nicolas y Diamars e Momo.
Ta duele bo ta haya ora bo mira con e actividadnan aki a bay atras.
Momito nunca a lanta cabez manera ta spera di e actividad aki.

Ni kico a wordo planea e aña aki no a resulta den loke e mester tabata.
Ta un reorganizacion completo mester haci di e actividad aki cu un campaña pisa rond di dje pa mira si e lo por keda of muri.

Mescos ta pa e anochi di kimamento di Momo.
Pa esaki e parada grandi por a wel keda afo, cu na su lugar un anochi di show cu bandanan musical den Entertainment Center y ultimo 15 minuut laga pickup cu Momito drenta pa por kime 12 or anochi.

E parada ta nada mas cu un jump up pa loco y na yegada mayoria di hende a baha bay.
Pa colmo televidentenan mester a mira na un banda riba pantaya e buniteza di parada di Momo na Corsow y na e otro banda di pantaya e “debacle” cu Aruba a presenta.
Aki tambe mester cuminza pensa na un cambio y un campaña y mercadeo pisa rond di e actividad aki.

Mester cuminza inverti y no depende riba “por nada of gratis” mas.
Cos a cambia den carnaval!
E institui un comision Momito y aki tin trabao pa haci, y mester “hinca man den saco” y ademas traha.

No traha 4 dia prome cu e actividad so pasobra e dianan ey “no por traha”.

JOUVERT

Mester inverti… Mester cuminza paga.. Cos pornada no ta drenta mas den carnaval.
Esaki ta conta tambe pa Jouvert Morning.
Ta nada bunita pa bo mira dos of tres banda “sin tocador” y cu ta e machine so ta zona y cu no tin atraccion pa e actividad aki.

Mester corda cu esaki ta un di e actividadnan cu turistanan ta ser informa di dje y cu nan no kier falta pero si nan yega te San Nicolas y e resulta un “Flop” y nan no ta di agrado cune, ta “negativo” pa e promocion.

Mester cuminza inverti den Jouvert Morning.
Busca bandanan sigur pa toca, tene un campaña pisa tras di e actividad; stimula hendenan pa bin participa cu informacion di kico nan por haci etc.

Si ta posibel hasta bende e actividad comercialmente cu un sponsor grandi cu “ta presenta Jouvert Morning”.
Manera e ta bayendo e ta cabando como atraccion grandi cu e tabata.
Campaña mester cuminza core por lo menos dos siman prome cu invitacionnan etc.

TEMPLATES

E “Carnival Templates” na San Nicolas e anochi prome cu Jouvert Morning tambe mester di un promocion y campaña fuerte.
Mester cuminza inverti den e actividad aki tambe y bende esaki cu un Sponsor grandi cu ta cubri gastonan si no ta inverti di parti organizadornan.

Templates mester cambia y bira actividad agradable. No djis un actividad cu un banda ta toca, un stand grandi ta bende su producto di refresca curpa y un stand cu ta bende su producto pa stoma.
Templates mester bira un actividad caminda tur hende por bin pasa un anochi cu familia y diverti durante e oranan di actividad.

No pa djis yega, cana rond sin cumpra algo y bira bay cas.
JUBU happening tabata hopi mas atractivo, siendo cu tur cos tabata draai rond di sponsornan cu no a sigui sponsor mas pasobra a falta e campaña y promocion grandi tur su añanan.

DJO DJO

Djo Djo na Talk of the Town den lugar di staciona auto tabata hopi mas atractivo y mihor bishita cu Templates.
Mester menciona sinembargo cu television a yuda hopi den esaki pa e atraccion di publico.
Djo Djo tambe tabata tin un bon sponsor su tras.

TOURIST

NIGHT

E Tourist Night nunca a resulta loke realmente e mester ta.
E aña aki atrobe den pura a core busca steelband pa bin toca y manera tur su añanan te awor nunca e “Tourist Night” tabata algo ORGANIZA y bon prepara. Semper a djis presenta ALGO pa bisa despues cu tabata tin un Tourist Night Exitoso, djis pasobra a mira turistanan eynan pasobra nan no tabata tin otro caminda di bay.
Pa mi, tur Tourist Night te awor tabata un “flop” completo pa falta di organizacion y SERIEDAD.

TUMBA

E concurso di tumba a scapa e aña aki y a resulta exitoso mescos cu e Tumberito.
Tanto concurso di tumba como e tumberito ta mustra di lo sigui progresa y por a nota cu e interes di publico tambe ta masha stabil pa e eventonan aki.

Loke ta falta ainda ta un tumba pa por kibra e dominio di roadmarch den parada pa por scucha un bon tumba ganador tambe toca pa e bandanan durante parada hunto cu roadmarchnan mas popular.

KAISO JR.

E concurso di roadmarch y calypso di mucha tambe mester di su comentario.
E aña aki el a resulta exitoso pa e organisadornan, pero…… Despues di e anochi aki tur e cancionnan di e muchanan ta PERDI.

E dia siguiente of kizas dos dia siguiente por tende un of dos di e cancionnan aki na radio y despues nan ta DOOD.
Den paradanan di carnaval no ta mira e cantantenan aki, no ta mira nan riba trucknan di musica y nan cancionnan no ta toca tampoco.

Pero mayornan si a gasta algun CIEN florin pa nan por a participa.
Ni e premio cu nan ta gana no ta cubri casi nada di e gasto cu tabata tin.
Cancionnan di nos tumberitonan tambe ta perdi pa e mes motibo.

INSCRIPCION

Pa inscribi pa concurso di Roadmarch y calypso y pa e concurso di tumba, tambe a bira actividadnan sin ningun briyo.
Esakinan por bira actividadnan caminda por hala publico pa bin presencia e inscripcion y caminda musica lo domina y tambe por tin ocacion pa cumpra bebida y snacks durante un actividad carnavalesco.

Pero ni bandanan musical ni e cantantenan y nan fanaticonan no ta duna aporte ni preocupa pa yuda haci e actividad aki un acontecimento di recreacion y diverticion.
Pa colmo, tin yen di reglamento di participacion y despues ta resulta cu e reglamentonan a wordo kibra tambe.

E aña aki hasta mester a pone un fecha di ultimatum pa por haya nomber di cantante, titulo di cancion, compositor y areglista, pasobra riba e anochi di inscripcion no a cumpli. SAC a pone pia abao na cierto actividad (chikito) pero ta pa e grandinan aki tambe mester pone pia abao y mantene e stipulacionnan cu ta conta pa un y tur, sino nunca lo siña.

A pone pia abao si despues di e ultimatum, y dos banda a keda afo pasobra no a cumpli, pero e pia abao fuerte aki mester a wordo tuma for di e prome anochi cu su reglamentonan.

RALPH

E aña aki mi a admira e manera cu Ralph Croes a sali dilanti pa disculpa pa cierto fayonan cu tabata tin.
Con el a acepta error cometi pa su persona publicamente y con el a disculpa pa cierto decisionnan tuma.

Esaki ta manera di actua y bo ta haya respet pa a acepta bo error publicamente y e respet aki el a haya sigur durante e concursonan.

PROMOCION

Nos concursonan ta falta masha hopi promocion.
Ta bira tempo pa cantantenan, compositornan, areglistanan y bandanan musical cuminza yuda cu promocion pa concursonan.

Ta despues cu POPO a referi riba e falta di promocion aki, por a nota cu e mes dia y e dia siguiente algun cantante a bay radio y a cuminza haci promocion pa nan participacion den tumba y den calypso y roadmarch.
Pa yuda promove e concurso y hala publico, ta bon pa e cantantenan duna informacion di nan mes como participante na tumba.

Laga sa cu ta di cuanto biaha bo ta participa; si bo a yega di clasifica entre e mihor 5 of 10 nan; si bo a yega di gana titulo of cay na di dos of di tres lugar.
Bo por hasta tira un “puña” pa cierto participante, locual nos pueblo ta gusta y cu ta yuda den e calentamento pa e actividad.

Esaki compositornan y areglistanan tambe por haci y mustra ta cual di nan cancionnan a yega di pega den concursonan anterior y kico ta spera di nan e aña aki.
Si ta posibel manda un potret hunto cu e informacionnan of busca a yega na radio of television pa promove bo participacion.

Loke ta pasa ta cu ta haya un lista (despues di basta dia) cu e cantantenan , areglista, compositor, titulo y banda musical, y te eynan tur promocion a keda tambe.
Di roadmarch y calypso parce cu nan tin miedo di menciona titulo of cantante cu e pensamento cu otro lo HORTA esaki di nan.

Publico kier sa kende ta kende y kico nan ta presenta.
Ta masha in-atractivo kico SAC ta haciendo ultimo dos aña di wanta e informacionnan aki atras ( si nan a haya esaki) y duna pa publica solamente e bandanan musical pa cada anochi, sin menciona cantantenan y nan cancionnan.

Publico no kier sa ki banda ta toca.
Nan kier sa kendenan e banda ta acompaña y cu ki calypso of roadmarch.
E dia despues di inscripcion esaki mester ta cla caba den man di cada corant, radio y television, sin keho cu no tin tipista of trahador den administracion pa haci esaki.
Pesey tin oficina y trahadornan administrativo.

MAÑAN

Te aki pa awe y lo sigui mañan cu e di tres parti di analisis 2010 di carnaval . Tur critica of keho ta bon bini via: jubynaar@ hotmail. Com of cel 566-2367

- Advertisement -

DUNA COMENTARIO

Please enter your comment!
Please enter your name here