Analisis politico….. DIMAS a bira pio!!!!
Un poco dia prome cu eleccion den un analsis politico bao di e titulo “Befehl ist Befehl” nos a trece padilanti cu berdad e maneho di e gobernantenan di MEP den hopi caso ta criminal. Nos a bisa acerca cu esaki ta normal pa MEP. Pero durante e ultimo añanan nan a haci cosnan cu hasta pa hopi simpatisador di MEP mes tabata di mas. Un di e partinan di nan maldad tabata e trato den casonan di permiso pa estadia. E manera cu un cantidad di ser humano a worde trata tabata contra tur principionan di derecho di hende. Un cantidad di casonan tabata sali den publicidad cu tabata mustra un falta di respet total pa conciudadanonan. A base di loke nos tabata mira nos a trece padilanti cu no pasobra e ministronan ta duna orden pa comete crimennan contra hende nos hefenan di departamentonan mester sigui e ordennan aki.
Den segundo guera munidal miyones di hende a worde mata door di esnan cu despues a bin desculpa nan mes cu Befehl ist befehl. Pasobra nan a haya e orden pa mata nan a mata pasobra orden ta orden.
Nos a bin constata cu na DIMAS e trato pa cu hende tabata hororoso y nos a critica esaki bisando cu no pasobra bo ta haya un orden di ariba ciegamente como ambtenaar bo mester ehecuta e orden. Si bo consenshi ta mustra bo cu esaki ta contra tur reglanan basico di respet pa sernan humano y bo nenga di ehecuta e orden bo ta worde proteha door di leynan.
Loke nos a bin constata ta cu e top di DIMAS tabata ehecuta e ordennan di nan ministro cu hopi smaak. E ora nos a constata cu nan ta pio cu e ministro y cu esaki ta inacceptabel. Den campaña AVP a duna hopi atencion na e situacion desastroso aki y a priminti seriamente cu e practicanan aki di gobierno lo pertenece na pasado asina cu gobierno cambia.
Esaki no a sosode y ta algo sumamente serio. Ainda cu firma di e directora di DIMAS hendenan ta worde notifica cu nan no ta haya permiso y cu nan mester bandona Aruba inmediatamente pa evita cu polis ta bin aresta nan y deporta nan manera criminal.
Esaki kier meen cu e top di DIMAS ta tuma henter gobierno pa payaso cu no tin ningun poder y ta tuma e ministro pa kens. Na un manera cla gobierno a declara cu lo tin un fin na e tratamento inhumano di prohimo y awo e mesun tratamento ta continuando.
Tin cosnan cu no por worde cambia den corto tempo ora gobierno cambia pero e maneho aki ta un decision di e ministro mester worde ehecuta y si e minstro a tuma e decision y e ambtenaar no respeta esaki e ambtenaar tin di bay.
E falta di respet pa gobierno y ministro no ta tolerabel. Ta trata aki di hendenan cu ya pa basta tempo ta trahando na famianan Arubiano cuidando nan mayornan of nan yiunan pa nan por traha y e permisonan a worde pidi manera e mester ta.
Pero e regla di loco cu MEP a introduci cu tur stranhero mester bay for di Aruba despues di tres aña ta worde aplica cu placer door di DIMAS causando un daño grandi na e persona en cuestion mes y pa esnan cu mester di e servicionan di e persona.
Ta inacceptabel cu pasobra e top di DIMAS ta di acuerdo cu e locura inhumano di MEP awe pueblio cu a manda MEP cas mester keda sufri. Esaki ta tumando luga y e hefenan di DIMAS ta mustra mundo cu nan tin e poder den nan man y e ministronan por pensa y bisa loke nan kier pero esaki no tin ningun efecto ariba nan desicionan cruel contra esnan cu nan ta desea.
Gobierno no por accepta esaki ningun dia mas. Esaki na prome luga pasobra e ta cruel contra hendenan inocente y ademas e ta mustra un gobierno debil cu lo no logra di cambia cosnan cu ta hopi malo mes.
Mientras e gobierno a declara cu e maneho criminal lo worde cambia casi e mesun dia cu e gobierno sinta e maldad di DIMAS ta sigui y ta parce cu no tin e forza pa paera esaki.
