Home Deporte Carondina y Anna ta logra tercer lugar cu nan equipo di Synchro...

Carondina y Anna ta logra tercer lugar cu nan equipo di Synchro na Hulanda

9
1
SHARE
- Advertisement -

landamento1ORANJESTAD(AAN)— Carondina Leijdekkers y Anna Posner ta impresióna durante e Campeonato Nacional di Hulanda den e deporte di landamento sincroniza y, como parti di e equipo “De Dolfijn” di Amsterdam, ta logra un excelente tercer puesto. Diasabra, dia 30 di januari e compleho acuatico “Sloterparkbad” na Amsterdam tabata escenario di e campeonato nacional di Hulanda, cu a conta cu participación di atletanan di Francia, Austria y Suisa, adicional na e mihor landadornan sincroniza di Hulanda.

Y entre nan e hobennan di Aruba, Carondina y Anna. Desde cu nan a establece nan mes na Hulanda pa nan estudio, Anna y Carondina a afilia na e prestigioso equipo “De Dolfijn” di e ciudad Amsterdam.

Aya nan ta wordo considera entre esnan mas fuerte y sigur mas experiencia den e deporte di synchro.

Anna y Carondina a representa nos país na numeroso ocasión durante competencianan internacional, y entre otro a luci den e equipo y dueto (Carondina) cu a participa cu tanto éxito na e Weganan Panamericano di 2007.

Combinando nan deporte stima cu e responsabilidadnan di estudio, Carondina y Anna ta logra keda activo den e deporte y actualmente ta preparando pa sigui competi pa Aruba, tratando di ripiti na juli proximo un clasificación den synchro pa e Weganan Panamericano di 2011.

Anna y Carondina ta conta: “Na Aruba nos training ta mucho mas intensivo y e nivel di creatividad ta mas halto. Pa nos, landando cu e equipo di De Dolfijn ta duna nos e posibilidad di sigui competi y keda progresa den e deporte di synchro mientras cu nos ta na Hulanda.”

Den combersacion cu entrenadora Danielle Blok, esaki ta conta: “Carondina y Anna sigur ta un aporte grandi na e equipo. Nos ta masha contento cu nan.”

Na final di e competencia di equipo técnico, enfrentando 15 otro equipo, entre nan atletanan di otro paisnan, e equipo di De Dolfijn ta logra un excelente tercer puesto durante e Campeonato Nacional di Hulanda.

- Advertisement -

1 COMMENT

  1. Pabien na e dos atletanan cu ta sirbi como rolemodels pa hopi jovenan cu ta bay studia afo. Disiplina y perseveransia ta pone nan logra den nan estudio y nan deporte. Carondina y Ana exito cu boso estudio y boso deporte, boso ta rolemodels. Sigui asina!

DUNA COMENTARIO

Please enter your comment!
Please enter your name here