Chef di Madame Janet a fayece den accidente
Aruba a conose su di tres morto den trafico pa aña 2010.
ORANJESTAD (AAN): Polis ta convenci, cu e chofer di un Nissan Sentra cu a causa e Hit & Run, a pone cu e chofer di unFord Explorer color blauw scur, a haye den accidente, y di cual el a fayece na e cruzada pabao di ex-Adventure Golf.
Pa mas o menos 3:10′or di marduga, Central di Polis a haya un yamada cu ta indica cu a sosode un accidente basta grave riba Sasakiweg, na e cruzada net panort di The Aruban Resort.
Na yegada patruya ta constata cu un Ford Explorer blauw scur, numera A-27067, lo a sufri un impacto riba e cruzada, sigui bay zuid y ranca un palo di luz cu ta keda pega cu cura di The Aruban Resort.
Como consecuencia di e impacto fuerte e SUV a bolter, y como cu e chofer no tabatin seatbelt bisti, el a worde catapulta for di e vehiculo, y na final e vehiculo mes a bin cay riba dje.Polis a constata cu e chauffeur tabata pega bao di e vehiculo.
E victima no tabata duna señal di bida mas. Pa mas o menos 3:40 a.m., Docter Habibe a constata morto di e victima Mathieu Lucien Melenboer, naci na Hulanda dia 15 di December 1978 y biba na San Barbola 288-A.
Den vecindario di e cruzada polisnan a haya un bumper di un auto cu plachi number riba dje (A-33644) y asina a sospecha di ta un caso di “Hit & Run”. Tambe nan a topa un testigo cu a presta declaracion y a bisa nan cu el a wak tur cos y cu e otro vehiculo envolvi a bandona e sitio. Tabata trata di un Nissan Sentra color beige.
Un investigacion den vecindario a produci e auto envolvi y pa mas o menos 6or di mainta e chauffer a entrega su mes na warda di Noord unda cu el a keda deteni pa investigacion.
Mathieu Melenboer ta trahando como Chef na Madam Jeanet Restaurant.
Cuerpo Policial kier manda palabra di condolencia pa e famianan di e fallecido y kier bisa tambe cu den e caso aki , probablemente velocidad halto y falta di uso di seat belt lo a hunga un rol grandi den e accidente fatal aki.
