Chofer di pickup deteni debi na accidente cu herido na Hooiberg
Posiblemente brommernan tabata pustando…
ORANJESTAD(AAN): E motociclista a keda herida y mester a worde transporta mesora pa hospital cu ambulance. E informacion a drenta diahuebs anochi cu tin un desgracia basta pisa riba e caminda di Oranjestad pa Santa Cruz na altura di Hooiberg Rumshop. Ora cu polis a yega nan a topa cu un motociclista benta canto di caminda ta keha di dolor. Tambe a haya un brommer benta riba caminda y un pickup di dwars parcialmente riba caminda.
Mientras cu personal di ambulance tabata atendiendo cu e herido polis tabata atende cu e chofer di e pickup. E tabata mustra bao influencia di alcohol y a keda deteni pa asina bay pasa test.
Algun testigo a conta polis cu e pickup a sali for di dilanti di e rumshop pa subi caminda grandi. El a bay traha un U-Turn.
E mesun testigonan ta bisa tambe cu dos brommer a sali for di e cruzada mas pariba y na dado momento a dal para banda di otro. Parce cu nan no tabata tin luz. Asina nan a sali manera bala di pistol bay abao comosifuera ta pusta nan tabata pustando.
E velocidad a pone cu un di e motociclistanan no por a para na tempo y ta dal den e pickup na su parti patras. E brommernan a lastra brake largo prome cu esun a dal. E otro motociclista si a scapa.
