Den Corte Huez a cuestiona manera di opera di e negoshinan compra y venta
*fiscal a indica cu O.M ta bay hasi un investigacion riba e negoshinan aki
ORANJESTAD(AAN): Diabierna na corte a tuma lugar un caso den cual Challier A.B a wordo acusa di ladronicia di joyas, perfume y otro articulonan for di un cas na Boroncana riba 7 di Augustus 2009. El a wordo acusa tambe di ladronicia di joyas, laptop y play station for di un cas na Tankileendert riba dia 10 di Augustus 2009. Ademas di esaki el a wordo acusa di intento di ladronicia for di un cas na Kudawecha riba 10 di Augustus. Huez a repasa e diferente rapportnan di e casonan.
Den e caso di 7 di Augustus, propietario di e cas a reporta na polis cu el a haya su cas reboltia y mas di 25.000 florin na joyas a desaparece. Testigonan a wak un Nissan Sentra cora sospechoso ta core rond y 3 mucha homber na dado momento ta core bek pa e auto na Boroncana.
Nan tabata tin algun articulo den nan man.
Polis a logra para e auto na dado momento y tabata tin tres persona den dje. hallier no tabata un di nan, pero ora polis a interoga e tres sospechosonan, su nomber tambe a cay. Na prome instancia e tres personanan a nenga cu nan lo tabata tin algo di haber cu hortamento, pero despues nan a admiti.
Nan a menciona tambe nomber di Challier y nan a splica con “Bobolongo” tabata busca nan pa nan bay na e diferente casnan pa horta. Pa ta sigur cu ningun hende tabata na cas na Boroncana por ehempel, nan a bay bati na e porta.
Ora cu ningun hende a contesta, un tal Bermudez a uza schroefdraaier pa habri porta patras di e cas. Nan a bay cu e joyas na Compra y Venta y Challier lo tabata esun cu a entrega e joyas.
Na un occasion nan a haya 500 florin y na otro occasion nan a haya 1000 florin.
Huez a remarca cu e ta haya straño con e negoshinan aki di Compra y Venta ta opera, siendo cu nan mester por pensa cu e joyas etc. por ta articulonan horta. El a bisa cu asina hopi biaha bo ta tende cu Compra y Venta a cumpra articulonan horta, pero nan no ta aparece na corte.
Huez a bisa cu nomber di Challier tabata den computer di Compra y Venta, pero ya caba for di dia 3 di Augustus. Ora polis a bay Compra y Venta pa puntra pa e joyas y nan a wordo bisa cu e joyas a wordo manda pa Compra y Venta di Tanki Leendert, cu ta specialmente pa articulonan di oro.
Net propietario tabata cla pa smelt e joyas.
E representantenan di e negoshi a splica cu normalmente e articulonan ta keda pa 3 luna, prome cu nan wordo bendi of ge-smelt, pero den mesun rosea nan a indica cu parti di e joyas a wordo manda caba pa Merca.
Huez a haya cu esaki tambe ta hole straño, pasobra e 3 lunanan no a pasa desde cu e joyas a wordo bendi na Compra y Venta y ya caba algun lo bay wordo gesmelt y otronan a wordo manda caba pa Merca. E acusado mes a declara cerca polis cu e no tabata sa cu e articulonan tabata horta.
El a splica cu su amigo “Jamaica” a bin cu joyas di su wela y como cu e ta menor di edad, el a puntra Challier pa bende nan na Compra y Venta y el a duna Challier 75 florin pa hasi esaki.
Ora a confronta “Bobolongo” cu Challier, diripiente el a bisa cu e no conoce Challier.
Jamaica tambe a bisa cu e no conoce Challier.
Despues cu polis a keda insisti, Bobolongo a admiti cu e conoce Challier y cu el a bay horta cu nan. Tabata door di miedo el a gaña cu e no conoce Challier. Segun huez, despues cu tur e acusadonan a bay KIA, diripiente un biaha mas Bobolongo a declara cu Challier no a bay horta cu nan.
El a bisa cu el a declara contra Challier, pasobra e tabata jaloers riba dje y door cu Challier y algun amigo a yega di maltrate. Huez a repasa carchi di castigo di C.B cu ta mustra cu na diferente occasion el a cay cera pa hortamento y cu hopi biaha el a haya chens.
Huez a bisa tambe cu el a wordo gara ta horta den su tempo di prueba, cu ta nifica cu fiscal por pidi pa e castigo condicional di e tempo ey, wordo poni ariba un posibel castigo den e caso actual.
Un di e personanan perhudica tambe a hiba palabra un rato.
E no a entrega un demanda como cu e no tabata tin recibonan di loke el a perde, pero el a bisa huez cu e ta spera cu e acusado haya un castigo largo, pa loke el a pone su famia pasa aden.
E homber a splica cu door di e ladronicia den e cas, su yiu di 4 aña tin miedo di drumi su so.
El a splica cu henter e famia no ta sinti nan mes safe den nan cas, door di loke a sosode.
Fiscal reaccionando riba loke huez a bisa di Compra y Venta, a bisa cu mester bin un claridad riba e manera cu e negoshinan aki ta opera.
El a bisa cu Ministerio Publico ta bay hasi un investigacion rond di e manera di opera di Compra y Venta. El a bisa si cu no necesariamente ta asina cu tur e negoshinan ey ta criminal of sa cu nan ta cumpra articulo horta, pero mester bin un claridad.
Fiscal a exigi un castigo di 9 luna, kitando e 172 dia cu el a sinta caba den detencion preventivo.
Ademas di esaki fiscal a pidi pa e castigo condicional cu Challier a haya den un otro caso, wordo poni riba su castigo. Huez a haya e acusacionnan comproba y a bay di acuerdo cu fiscal, dunando e acusado un castigo di 9 luna.
