Den corte lo pidi bancarota di Boekhandel Mariska

Publication: Saturday, 27 February 2010. Categoria: General

Trahadornan y otronan no ta hayando pago…
ORANJESTAD(AAN):– Despues di hopi aña di existencia, Boekhandel Mariska parce di ta birando un otro victima di e fenomeno di no cambia maneho cu tempo y di e recesion economico.
Mas of menos 5 entidad, entre nan e trahadornan a pidi Corte pa declara e compania bancarota. E caso ta tuma lugar dia 9 di Maart proximo. Ken no conoce Boekhandel Mariska maneha pa hopi anja dor di Sr. Paul Van Niel den su tempo di gloria y a sa di hiba e compania na nivelnan halto.

For di tempo cu e tabata situa den Middenweg y recientemente a muda pa Windstraat unda antes tabata Casa de Juguetes, e tabata forma parti di e trio di boekhandelnan mas conoci riba nos isla den añanan 80, esta Boekhandel Mariska, Van Dorp y De Wit Store. Studiantenan tabata pasa den e tres establecimientonan aki constantemente despues di scol, sea pa cumpra material of djis pa “hang out”.

Pero añanan a bay ta pasando y mas negoshi a cuminsa interesa nan mes den benta di pen, potlood, revista y hasta carchi di bon deseo. Riba dje, surgimento di companianan cybernetico manera www.amazon.com na unda por cumpra buki via internet y paga cu credit card tampoco no ta yuda pa mantene e tipo di tiendanan asina habri.

Por lo menos no si keda man cruza y laga e tendencianan nobo y moderno aki tuma rienda y bay cu e mercado completo.

Boekhandel Mariska como tal a keda pega den tempo, no ta haci mucho, pa no bisa nada na mercadeo ni promocion di nan productonan.

Y riba dje a bin e recesion mundial cu no por bira e culpa di tur problema di companianan, pero si ta e ultimo gota pa laga e hemchi bay over.

Den e caso specifico aki, trahadornan ta kehando cu for di luna di Augustus aña pasa nan no ta cobrando nan salario at all of no completo.

Asina mes, trahadornan cu a dedica henter nan bida na e negoshi a sinti duele y a hasta bay fia placa personal na banco pa yuda e negoshi, pero e no a yuda.

E doño di e boekhandel mes a fayece algun aña pasa y su señora y yiu a keda encarga cu e negoshi.

Lamentablemente ningun tin e pasion y dedicacion cu e tata tabatin tempo cu e tabata maneha e boekhandel, hunto cu Sr. Paul van Niel (prome cu el a baha cu pensioen) e tempo aya.Y como tal e trahadornan a para mira con e compania a bin abao, con carga ta yega y nan no por sali pasobra no tin placa pa paga pa e carga.

Riba dje, tin por lo menos 5 compania cu a uni nan mes na e causa aki, bisando cu e Boekhandel no ta cumpliendo cu nan debe cu nan. Tur a sera cabes, hunto cu e empleadonan, pa entama un caso den Corte di Prome Instancia pa pidi bancarota di Boekhandel Mariska.

Abogado mr. Dello Gomez ta representa e trahadornan den e caso aki, e mesun abogado cu no mucho siman atras a logra manda The Aruban Resort bancarota tambe den nomber di e trahadornan.