Desmantelacion di Antiyas ta bin cu diferente consecuencia
tambe pa aviacion civil
ORANJESTAD(AAN): Tin desaroyonan andando pa loke ta bay bira e desmantelacion di Antiyas. Aviacion Civil di Aruba lo no laga esaki sorpresa nan. Pesey mes ta trahando pa mira ki tipo di tratado lo por yega prome cu e fecha. Director di Aviacion Civil Adi Maduro a splica cu e desmantelacion di Antiyas ta bin cu diferente consecuencianan riba diferente aspecto. Bo ta haya por ehempel un aspect di politica di aviacion.
Actualmente tin un tratado bilateral cu Antiyas. Despues di October 2010 Antiyas no ta bay existi mas.
E ora ey mester bay negocia un tratado cu pais Corsow, mester negocia tambe cu Hulanda referente na e islanan BES y cu St Maarten tambe.
Maduro a bisa cu tin un tendencia den Reino cu ta bisa cu ta un reino y pa hasi un politica di cielo habri den reino na unda cu tur pais ta haya trato igual.
Sinembargo pa esey tambe tin cu negocia y evalua hopi bon, pasobra por bin competencia asina desigual cu e por bira peligroso.
Hopi biaha bo por bisa por ehempel cu ta bay controla tarifa, pasobra tal avion no por bula cu un tarifa cu no ta cover su operacion. Tur eseynan mester wordo negocia.
Maduro a sigui bisa cu na 2008 Reino Hulandes tabata tin e auditoria di IKEO na unda cu tabata tin hopi preparacionnan cu mester a wordo hasi riba ley, riba entrenamento di e hendenan y riba bo organizacion mes.
Bo por tin e hendenan bon getrain, pero si bo no hasi uso adecuado di nan, pues uza ‘the right man on the right spot’, e no ta recomendable.
Esaki segun Maduro kende a sigui bisa cu door di esey na 2006 e tres Ministernan riba recomendacion di e tres directornan di aviacion civil di reino, a firma un protocol.
E protocol tabata encera pa traha na mira di e auditoria di IKEO.
Riba esey e cooperacion a bira hopi bon y a crece actualmente entre e 3 directornan di Reino Hulandes.
Hopi cos a wordo organiza, incluyendo e conferencia riba transporte aereo, na 2009.
Eynan hopi hende por a mira e situacion, duna e apoyo y opinion pa loke ta e cambionan cu ta bay bin.
