Despues di diez aña Arumil lo bolbe participa na Nijmegen
Den caminata di militarnan di rond mundo:
ORANJESTAD (AAN) — Matutino DIARIO a entrevista señor Lorenzo Texeira, Comandante de Peloton na Savaneta Kamp Kazerne, relaciona cu nan preparacion pa un competencia di canamento, den cual nan lo participa na Hulanda, representando Aruba. Comandante Texeira a duna di conoce cu nan ta preparando pa e actividad menciona, cu lo bay tuma lugar na Juli proximo di 21 pa 24 na Nijmegen, y aworaki nan ta canando un distancia di 24 kilometer.
Di dos pa tres biaha pa siman e entrenamento ta tumando lugar. E evento aki ta esun di mas grandi cu ta worde organiza na Hulanda anualmente, y masha hopi militar internacional ta participa den dje.
Riba e caminata cada militar ta cana carga cu un peso di diez kilo riba lomba tambe. E biaha aki lo mira Aruba su bandera desfila tambe, sr. Texeira a subraya. El a bisa cu ta despues di diez aña (2000) cu Arumil a participa den e mesun evento aki, awor na 2010 ta bolbe ta presente.
Na Hulanda nan lo cana mas of menos 40 kilometer pa dia, durante cuatro dia consecutivo, cu tres punto di descanso cu nan por sinta di 20 pa 30 minuut tuma un sopi y algo di bebe, pa despues sigui riba e caminda.
E delegacion di Arumil cu lo representa Aruba na Nijmegen ta mixto, esta tin militarnan nobo y otronan cu tin mas aña, y tin dos caporal cu tambe lo participa.
Marina mes ta cubri e gastonan y nan kier cera un grupo di mas of menos 20 persona y parti di nan ta entrenando pa basta tempo caba.
